आगामी स्थानिक स्वराज्य संस्थांच्या निवडणुकांना अवघे काही महिने शिल्लक आहेत. लवकरच या निवडणुका पार पडण्याची शक्यता आहे. याच पार्श्वभूमीवर राज्यात राजकीय वारे वेगाने वाहू लागले आहेत. अशातच पिंपरी चिंचवडमध्ये भाजपला धक्का बसला आहे. भाजपचे नवनियु्क्त जिल्हा उपाध्यक्ष तसेच पिंपरी चिंचवड महापालिकेचे माजी महापौर तुषार हिंगे यांनी आपल्या पदाचा राजीनामा दिला आहे.

पिंपरी चिंचवड शहरात भारतीय जनता पक्षाने जाहीर केलेल्या जम्बो कार्यकारणीत अगदी काही तासांतच फूट पडली. भाजप नवनियुक्त जिल्हा उपाध्यक्ष तसेच पिंपरी चिंचवड महापालिकेचे माजी महापौर तुषार हिंगे यांनी आपल्या पदाचा राजीनामा दिला. भारतीय जनता पक्षाचे शहाराध्यक्ष शत्रुघ्न उर्फ बापू काटे यांच्याकडे त्यांनी राजीनामा सोपवला आहे.

राजीनामा दिल्यानंतर तुषार हिंगे यांनी मनातील खदखद बोलून दाखवली. 'पिंपरी विधानसभा क्षेत्रावर भाजपकडून अन्याय केला जात आहे. या विरोधात मी जिल्हा उपाध्यक्ष पदाचा राजीनामा देत आहे. माझी मागणी होती ती, एखाद्या पदाधिकाऱ्याला शहरचिटणीस पद देण्यात यावं. मात्र, पक्षाकडून माझ्या मागणीची उपेक्षा करण्यात आली.'

'सातत्यानं माझी मागणी डावलली गेली. याच कारणामुळे मी राजीनामा देण्याचा निर्णय घेतला आहे', असं तुषार हिंगे म्हणाले. प्रसार माध्यमांशी बोलताना त्यांनी नाराजी व्यक्त केली. त्यांच्या या राजीनाम्यामुळे पिंपरी चिंचवड भाजपमध्ये नाराजीचा सूर अधिकच तीव्र झाला आहे.