मावळ, ता. ३० जुलै २०२४

राज्याच्या राजकारणात विधानसभा निवडणुकांचे वारे वाहू लागले आहेत. लोकसभेनंतर आता विधानसभेच्या जागा वाटपावरुन महाविकास आघाडी तसेच महायुतीमध्ये कलगीतुरा रंगणार आहे. महायुतीमध्ये विधानसभेच्या जागा वाटपावरुन महायुतीमध्ये पहिली ठिणगी पडली असून मावळ मतदार संघावर भाजपने दावा केल्याने राष्ट्रवादी अजित पवार गटही आक्रमक झाला आहे.

राष्ट्रवादीच्या जागेवर भाजपचा डोळा

भाजपचे माजी राज्यमंत्री बाळा भेगडेंनी मावळ विधानसभेचा पुढचा आमदार कमळाच्या चिन्हावर निवडून येईल, असा दावा करत 2 ऑगस्टला मावळ विधानसभेत मेळाव्याचे आयोजन केले आहे .महायुतीचे प्रमुख मुख्यमंत्री आणि दोन्ही उपमुख्यमंत्री याबाबत निर्णय घेणार आहेत, असे त्यांनी म्हटले आहे. मात्र सध्या मावळचे आमदार असलेले राष्ट्रवादी अजित पवार गटाचे आमदार सुनिल शेळके यांनी भाजपच्या दाव्यावरुन नाराजी व्यक्त केली आहे.

सुनील शेळके आक्रमक

"मावळ लोकसभेत राष्ट्रवादीने महायुतीचा धर्म पाळला. मात्र त्यावर शंका घेत भाजप धरलेला हा आग्रह योग्य नसल्याचे म्हणत आमदार सुनिल शेळके यांनी म्हटले आहे. तसेच ज्या पक्षाचा आमदार, त्याच पक्षाच्या वाट्याला ती विधानसभा, असा बेसिक फॉर्म्युला महायुतीत ठरला आहे," असेही सुनिल शेळके म्हणाले.

"प्रत्येकाला महत्वाकांक्षा असल्यानं विधानसभा लढण्याची इच्छा व्यक्त करण्यात काही गैर नाही, त्या सर्वांनी माझ्या शुभेच्छा आहेत. मात्र मी आगामी विधानसभा लढायला ठाम आहे का? हा निर्णय मी जनतेला विचारून घेईन. इतकंच काय तर 2 ऑगस्टच्या भाजपच्या मेळाव्याला ही मी जाऊ शकतो," असं म्हणत शेळकेंनी संभ्रम निर्माण करण्याचा प्रयत्न केला आहे.