MPSC 265 posts, DySP BDO recruitmen Update : महाराष्ट्र लोकसेवा आयोगाच्या (MPSC) परीक्षेची तयारी करणाऱ्या स्पर्धा परीक्षार्थींसाठी अत्यंत महत्त्वाची आणि दिलासादायक बातमी समोर आली आहे. एमपीएससीने नागरी सेवा परीक्षेच्या (MPSC State Services Exam) एकूण पदसंख्येत मोठी वाढ केली आहे. सुधारित पत्रकानुसार, आता ८७ वरून तब्बल २६५ जागांसाठी ही भरती प्रक्रिया राबवली जाणार आहे.

याआधी एमपीएससीने नागरी सेवा परीक्षेसाठी केवळ ८७ जागांची जाहिरात प्रसिद्ध केली होती. यामुळे विद्यार्थ्यांमध्ये काहीसा नाराजीचा सूर होता. मात्र, आता यामध्ये सुधारणा करण्यात आली असून जागांची संख्या मोठ्या प्रमाणात वाढवण्यात आली आहे. ८७ जागांवरून आता थेट २६५ वर जागा वाढवण्यात आल्या आहेत. महाराष्ट्र लोकसेवा आयोगाने या संदर्भातील अधिकृत प्रसिद्धीपत्राक जारी करून ही माहिती दिली आहे. त्याशिवाय MPSC कडून ही माहिती एक्स खात्यावरही पोस्ट करण्यात आली आहे.

वाढवण्यात आलेल्या नव्या पदसंख्येमध्ये प्रशासनातील अत्यंत प्रतिष्ठेच्या आणि महत्त्वाच्या पदांचा समावेश करण्यात आला आहे. यामध्ये पोलीस उपअधीक्षक (DySP) आणि गटविकास अधिकारी (BDO) यासारख्या पदांचा समावेश करण्यात आलेला आहे. त्याशिवाय अनेक वर्ग-१ आणि वर्ग-२ च्या पदांचा समावेश आहे. मात्र, यंदाही 'उपजिल्हाधिकारी' (Deputy Collector) पदाचा या वाढीव जागांमध्ये समावेश करण्यात आलेला नाही, याबाबतची माहिती समोर आली आहे.

जागांमध्ये झालेल्या या मोठ्या वाढीमुळे गेल्या अनेक महिन्यांपासून अहोरात्र अभ्यास करणाऱ्या राज्यातील लाखो विद्यार्थ्यांना मोठा दिलासा मिळाला आहे. त्यांच्यातील स्पर्धेला आता नवा हुरूप येणार आहे. वाढलेल्या जागांबाबत एमपीएससीकडून सोशल मीडियावर माहिती देण्यात आली आहे. त्याशिवाय संकेतस्थळावर सविस्तर माहिती उपलब्ध असेल.