Mumbai News: बारसू रिफायनरी प्रकल्पावरुन (Barsu Project) वाद आता चांगलाच वाढत चालला आहे. या प्रकल्पावरुन राज्य सरकारवर टीका करणाऱ्या ठाकरे गटाचे खासदार संजय राऊतांना उद्योगमंत्री उदय सामंत (Uday Samant) यांनी प्रत्युत्तर दिले आहे. तसंच विनायक राऊत (Vinayak Raut) यांच्यावर देखील त्यांनी यावेळी टीका केली. 'प्रकल्पग्रस्तांच्या नावाखाली पक्षाचे राजकारण करू नका. दोन्ही राऊतांची भूमिका संभ्रम निर्माण करणारी आहे.', अशी टीका त्यांनी यावेळी केली.

उदय सामंत यांनी मुंबईमध्ये पत्रकारांशी संवाद साधताना बारसू प्रकल्पावर टीका करणाऱ्या संजय राऊत आणि विनायक राऊत यांच्यावर टीका केली. त्यांनी यावेळी सांगितले की 'विनायक राऊतांनी कलम 144 चं उल्लघंन केलं म्हणून त्यांना ताब्यात घेतलं. प्रकल्पग्रस्तांच्या नावाखाली पक्षाचे राजकारण करू नका. दोन्ही राऊतांची भूमिका संभ्रम निर्माण करणारी आहे.' 'जिथे मोर्चा आहे तिथे विनायक राऊतांनी जावे. जिथे परिक्षण सुरु आहे तिथे ते का जात आहेत?, असा सवाल यावेळी उदय सामंत यांनी केला.

उदय सामंत यांनी यावेळी बारसूच्या जागेसंदर्भात पंतप्रधान नरेंद्र मोदींना पत्र पाठवणाऱ्या ठाकरे सरकारवर देखील निशाणा साधला. 'पूर्वीच्या सरकारचं जे ध्येयधोरण ठरलेलं आहे त्यानुसार होत आहे. पत्र देताना ग्रामस्थांची चर्चा केली नव्हती. आता का एवढा टाहो फोडला जात आहे.', अशी टीका त्यांनी केली. तसंच, 'काही जणं पत्रव्यवहार करून वातावरण तापवत आहेत. शेतकर्यांना समोर आणून मागून राजकारण केलं जात आहे.' अशी देखील टीका त्यांनी केली.

'मुंबईतले समाजसेवक हे रिफायनरीच्या विरोधात भूमिका मांडत आहेत. अजून कोणतंही नोटिफीकेशन निघालेलं नाही. त्यांना किंवा त्यांच्या नेत्यांना अन्य काहीही माहिती हवी असल्यास ती देण्यात येईल. पण राजकारण करु नका.', असे आवाहन त्यांनी केले आहे. त्यासोबतच, 'शेतकऱ्यांना तिथे पेटवण्यापेक्षा त्यांच्या चुली पेटवणं गरजेचं आहे. कुठेही दडपशाही करून हा प्रकल्प रेटायचा नाही. शेतकऱ्यांना विश्वासात घेऊनच हा प्रकल्प होणार अशी आमचीही भूमिका आहे. बेरोजगारीचा प्रश्न मिटवायचा आहे. तर त्याचाही विचार व्हायला हवा', असं त्यांनी यावेळी स्पष्ट केले.