मयुरेश कडव, बदलापूर प्रतिनिधी

Badlapur platform closure, Central Railway decision : मध्य रेल्वेच्या तुघलकी कारभाराचा बदलापुरातील रेल्वे प्रवाशांना मोठा फटका बसणार आहे. कारण रेल्वे प्रशासनानं बदलापूर स्थानकावरील प्लॅटफॉर्म क्रमांक एक कायमस्वरूपी बंद करण्याचा निर्णय घेतलाय. तुघलकी निर्णयामुळे प्रवाशांची फरफट होणार आहे. रेल्वेच्या निर्णयाविरोधात प्रवाशांमध्ये संतापाची लाट उसळलीय.

मध्य रेल्वेच्या बदलापूर रेल्वे स्थानकातील प्लॅटफॉर्म क्रमांक एक कायमस्वरूपी बंद करण्याचा निर्णय वर्षभरापूर्वी घेण्यात आला होता. मात्र प्रवाशांनी त्याला कडाडून विरोध केल्यानंतर रेल्वेकडून या निर्णयाला स्थगिती देण्यात आली होती. मात्र आता पुन्हा एकदा रेल्वे प्रशासनानं जुनाच घाट घातलाय. मेगाब्लॉक घेऊन प्लॅटफॉर्म क्रमांक एक वर बॅरिकेटिंग केलं जाणार आहे. याची प्रवाशांमध्ये कुठेही वाच्यता होऊ नये, यासाठी रेल्वे प्रशासनाकडून गोपनीयता पाळण्यात येत आहे.

सध्या अस्तित्वात असलेला प्लॅटफॉर्म क्रमांक एक हा कायमस्वरूपी रेलिंग लावून बंद करण्यात येणार असल्याने बदलापूर पूर्वेकडे राहणाऱ्या प्रवाशांना मोठी फरफट होणार आहे. इतकच नाही तर पूर्वेकडील प्रवाशांना पश्चिमेकडे जाऊन मग प्लॅटफॉर्म क्रमांक एक वरून म्हणजे सध्याच्या होम प्लॅटफॉर्मवरून गाडी पकडावी लागेल. होम प्लॅटफॉर्मच्या नावाखाली मध्य रेल्वे प्रशासनानं बदलापूरकरांची केलेली ही मोठी फसवणूक असून याविरोधात बदलापुरातील रेल्वे प्रवासी अत्यंत आक्रमक भूमिका घेण्याच्या मनस्थितीत आहेत.