संजय गडदे, मुंबई

मालाड रेल्वे स्थानकात एका प्राध्यापकाची निर्घृण हत्या झाल्याची घटना ताजी असतानाच, पश्चिम रेल्वे मार्गावर आणखी एक गंभीर प्रकार समोर आला आहे. रेल्वे प्रवासादरम्यान दोन प्रवाशांमध्ये झालेल्या भांडणात तिसऱ्याच तरुणाला आपला एक डोळा गमवावा लागला. या घटनेमुळे प्रवाशांच्या सुरक्षेचा प्रश्न पुन्हा ऐरणीवर आला आहे. मात्र या प्रकरणात वांद्रे लोहमार्ग पोलिसांनी जलद कारवाई करत अवघ्या २४ तासांत आरोपीला अटक केली आहे. योगेंद्र वंशराज बौद्ध असं अटक करण्यात आलेल्या आरोपीचे नाव आहे.

लोहमार्ग पोलिसांकडून मिळालेल्या माहितीनुसार, ही घटना अंधेरी–वांद्रे रेल्वे स्थानकांदरम्यान घडली. पीडित तरुणाचे नाव निशांत रत्नाकुमार खत्री असे आहे. पीडित तरुण हा ट्रेनने आपल्या कामावरून घरी जात होता. दरम्यान, ट्रेनमध्ये आधीच उपस्थित असलेल्या दोन प्रवाशांमध्ये किरकोळ वाद सुरु होता. या वादातून एकाने दगड भिरकवला, मात्र तो ट्रेनवर आदळला. त्यानंतर दुसरा दगड भिरकावला असता तो निशांतच्या डोळ्यावर बसला. पीडित तरुणाच्या डोळ्याला गंभीर इजा होऊन दृष्टी कायमस्वरूपी बाधित झाली.

घटनेनंतर जखमी तरुणाला तातडीने रुग्णालयात दाखल करण्यात आले. घटनेची माहिती मिळताच वांद्रे लोहमार्ग पोलिस ठाण्याच्या पथकाने तपासाची चक्रे फिरवली. सीसीटीव्ही फुटेज, प्रत्यक्षदर्शींचे जबाब आणि तांत्रिक विश्लेषणाच्या आधारे आरोपीची ओळख पटवण्यात आली.

लोहमार्ग पोलिसांनी २४ तासांच्या आत आरोपीला अटक करून त्याच्याकडून चौकशी सुरू केली आहे. आरोपीविरोधात भारतीय न्याय संहितेतील गंभीर कलमांखाली गुन्हा दाखल करण्यात आला असून, पुढील तपास सुरू आहे. दरम्यान, मालाड रेल्वे स्थानकातील प्राध्यापक हत्येनंतर सलग घडलेल्या या घटनेमुळे पश्चिम रेल्वेवरील प्रवाशांच्या सुरक्षेबाबत चिंता व्यक्त केली जात आहे.

मात्र या प्रकरणात लोहमार्ग पोलिसांनी दाखवलेल्या तत्परतेचे कौतुकही केले जात आहे. लोहमार्ग पोलिसांनी प्रवाशांना आवाहन केले आहे की, संशयास्पद प्रकार, भांडणे किंवा गैरप्रकार तात्काळ पोलिसांच्या निदर्शनास आणावेत, जेणेकरून वेळीच कारवाई करता येईल.