मुंबई: कंत्राटदाराने जमा केलेली सुरक्षा ठेव परत मिळवण्यासाठी एक लाखाची लाच घेताना सीबीआयने सोलापूरच्या युटिलिटी पॉवरटेक लिमिटेडच्या अभियंत्याला अटक केली आहे. CBI ने युटिलिटी पॉवर टेक लिमिटेड (खाजगी कंपनी) आणि नॅशनल थर्मल पॉवर कॉर्पोरेशन, गव्हर्नमेंट ऑफ इंडिया एंटरप्राइझची (खाजगी कंपनी) आणि जॉइंट व्हेंचर कंपनीच्या अभियंत्याविरुद्ध तक्रारीच्या आधारे गुन्हा नोंदवला आहे.

मिळालेल्या माहितीनुसार तक्रारदार कंत्राटदाराने जमा केलेली सुरक्षा ठेव परत मिळवण्यासाठी सदर अभियंत्याने अडीच लाखांची मागणी केल्याचा आरोप या अभियंत्यावर आहे. या अभियंत्याने कंत्राटदाराला २.५० लाखाची लाच (Bribe) मागितली होती. शिवाय तडजोडी अंति ही रक्कम २ लाख ठरविण्यात आली होती. मात्र सदर रक्कम देण्याची इच्छा नसल्याने तक्रारदाराने सीबीआयकडे तक्रार केली.

पाहा व्हिडीओ -

कंत्राटदाराच्या तक्रारीनुसार सीबीआयने सापळा रचून लाचखोर अभियंत्याला पहिला हप्ता म्हणून १ लाख रुपये स्विकारताना CBI च्या अधिराऱ्यांनी रंगेहाथ पकडलं. शिवाय या प्रकरणी आरोपींच्या सोलापुरातील घराची झडती घेण्यात आली असून त्यामध्ये गुन्ह्याची कागदपत्रे जप्त करण्यात आली आहेत. आरोपीला सोलापूर येथील न्यायालयात हजर केले असता १४ दिवसांची न्यायालयीन कोठडी सुनावली आहे.

Edited By - Jagdish Patil