काँग्रेसच्या१२ नगरसेवकांना थेट भाजपात प्रवेश देऊन अंबरनाथ नगरपालिकेतला सत्तेचा तिढा प्रदेशाध्यक्ष रवींद्र चव्हाणांनी सोडवला खरा...मात्र या सत्तेच्या संघर्षात दुसऱ्याच दिवशी मोठा ट्विस्ट आला. खासदार श्रीकांत शिंदेंनी थेट अजितदादांच्या राष्ट्रवादीच्या चार नगरसेवकांना गळाला लावत रवींद्र चव्हाणांची हीच खेळी उधळून भाजपवर कुरघोडी केली.. सत्तासंघर्षांच्या दुसऱ्या अंकात शिंदेसेनेनं बाजी मारत अंबरनाथ नगरपरिषदेत सत्ता स्थापनेचा दावा केलाय...

अंबरनाथमध्ये शिंदेसेनेचे 28, अजित पवारांच्या राष्ट्रवादीचे 4 अशा 32 नगसेवकांनी नगरपालिकेवर सत्ता स्थापन केल्याचा दावा आहे...तर दुसरीकडे काँग्रेसमधून भाजपात पक्षप्रवेश केलेल्या 12 नगरसेवकांसह भाजपचे 15 नगरसेवक मिळून संख्याबळ 27 झाले..... त्यामुळे राष्ट्रवादीचे नगरसेवक गळाला लावून शिंदेसेनेनं सत्ता स्थापनेसाठी भाजपवर कुरघोडी केलीय.

अंबरनाथ हा शिवसेनेचा बालेकिल्ला राहिलाय... मात्र शिवसेनेतील फुटीनंतर शहरातील व्यक्तीकेंद्रीत राजकारणाला कंटाळून अंबरनाथकरांनी भाजपच्या नगराध्यक्षाला पंसती दिली... मात्र सत्तेसाठी लागणाऱ्या पुरेसे नगरसेवक निवडून आणण्यात भाजपला अपयश आलं. मात्र शिंदेसेनेनं २८ जागांसह पहिल्या क्रमांकावर मजल मारली. त्यामुळे याठिकाणी राज्याच्या सत्तेत मित्र असलेले अंबरनाथमध्येही युती करतील असं वाटत असताना शिंदेंच्या तोंडचा घास भाजपनं हिरावला.

अंबरनाथमधील भाजपचे नेते गुलाबराव करंजुले पाटील आणि शिवसेनेचे शहरप्रमुख अरविंद वाळेकर यांच्यातल्या वादामुळे अंबरनाथमध्ये युती होऊ शकली नाही..आणि यामुळेच सत्तेसाठी भाजप आणि काँग्रेसची अभद्र आघाडी राज्याला पाहायला मिळाली. मात्र शिंदेसेनेनं कुरघोडी केल्यामुळे सर्वात जास्त कोंडी झाली ती सत्तेसाठी भाजपात प्रवेश केलेल्या काँग्रेसच्या १२ नगरसेवकांची. आता हा सत्तेचा संघर्ष इथेच थांबणार की अजून तिसरा अंक पाहायला मिळणार याचीच उत्सुकता लागलीय.