माढ्याच्या डीवायएसपी थेट अजित पवारांना भिडल्या.. मात्र अजित पवारांना भिडणाऱ्या अंजली कृष्णा नेमक्या कोण आहेत? आणि अमोल मिटकरींनी त्यांची युपीएससीकडे तक्रार का केलीय? पाहूयात. हे संभाषण आहे राज्याचे उपमुख्यमंत्री अजित पवार आणि सोलापूरच्या माढ्याच्या पोलीस उपअधीक्षक अंजली कृष्णा यांच्यातील. अंजली कृष्णा अवैध मुरुम उपशावरुन थेट अजित पवारांनाच भिडल्यात.तर अजित पवारांनी अंजली कृष्णांवर कारवाईचा इशारा दिलाय.

हा आवाज नीट ऐका. अवैध मुरुम उत्खननाविरोधात कारवाई करणाऱ्या आणि अजित पवारांना थेट भिडणाऱ्या या पोलीस उपअधीक्षक अंजली कृष्णांच्या हिंमतीची जोरदार चर्चा रंगलीय. मात्र अजित पवारांना भिडणाऱ्या अंजली कृष्णा कोण आहेत? पाहूयात. अंजली कृष्णा मूळच्या केरळच्या तिरुअनंतपुरमच्या. वडीलांचं कपड्याचं दुकान तर आई टायपिस्ट म्हणून काम करतात.. त्या 2023 बॅचच्या IPS अधिकारी आहेत.. 2 वर्षापासून त्या राज्यात कार्यरत आहेत.. तर प्रामाणिक आणि दृढनिश्चयी अशी अंजली कृष्णांची ओळख आहे.

मात्र माढ्यातील कुर्डू गावच्या रहिवाशांनी मुरुम उपशाची परवानगी होती. त्यानंतरही अंजली कृष्णा कारवाई करत होत्या, असा आरोप केलाय. मात्र अजित पवारांनी ज्या कार्यकर्त्यांसाठी अंजली कृष्णांना फोन केला. त्याच कार्यकर्त्यांवर आता बेकायदेशीर जमाव जमवून शासकीय कामात अडथळा आणल्याचा गुन्हा दाखल करण्यात आलाय. तर दुसरीकडे अजित पवारांच्या राष्ट्रवादीचे आमदार अमोल मिटकरींनी अंजली कृष्णांची डेअरिंग काढत त्यांच्या चौकशीची मागणी करत युपीएससीला पत्र लिहिलंय.

अंजली कृष्णांना दम दिल्याप्रकरणी विरोधकांनी टीकेची झोड उठवली. त्यामुळे अखेर या वादावर पडदा टाकण्यासाठी अजित पवारांनी स्पष्टीकरण जारी केलंय. अजित पवारांनी ट्वीट करुन म्हटलंय की, कायद्याच्या अंमलबजावणीत हस्तक्षेप करण्याचा माझा उद्देश नव्हता.. मात्र त्या ठिकाणची परिस्थिती शांत राहावी आणि ती अधिक बिघडू नये याच्या काळजीचा होता... आपल्या पोलीस दलाबद्दल तसंच धैर्यानं आणि प्रामाणिकपणे काम करणाऱ्या महिला अधिकाऱ्यांबद्दल मला सर्वोच्च आदर आहे.. मी पारदर्शक कारभारासाठी आणि बेकायदेशीर वाळू, माती, खडक उपशासह प्रत्येक बेकायदेशीर कृतीवर कायद्याप्रमाणे कठोर कारवाई करण्यासाठी कटिबद्ध आहे.

अनेक पोलीस अधिकारी अवैध प्रकारांविरोधात प्रामाणिकपणे सिंघम स्टाईल कारवाई करत असतात. याप्रकरणी अजित पवारांनी आदर व्यक्त करत आपलं स्पष्टीकरण दिलं ..पण त्यांचे आमदार मात्र हुजरेगिरी करण्यात धन्यता मानताना दिसत आह्ेत.. प्रामाणिक अधिकाऱ्याची चौकशी कऱण्याचे मागणी करत आपण प्रामाणिक अधिकाऱ्यांचं खच्चीकरण करत आहोत याचं भानही त्यांना अशावेळी रहात नाही.