मुंबई : मुंबईत परराज्यातून, परदेशातून येणाऱ्यांची संख्या मोठी आहे. अनेकजण इथे कामानिमित्त येतात आणि मुंबईतच घर भाड्याने घेऊन राहतात. मात्र असेही काहीजण असतात ज्यांचा उद्देश चुकीचा असते. म्हणूनच सामाजिक हित लक्षात घेत मुंबई पोलिसांनी बुधवारी मुंबईत घर भाड्याने देऊ इच्छिणाऱ्यांसाठी काही अधिसूचना जारी केली आहे.

मुंबई पोलीस आयुक्तालयाच्या अखत्यारीत असणाऱ्या भागात सध्या निर्माण झालेली परिस्थिती पाहता, असामाजिक घटक रहिवासी भागात लपून बसण्याची शक्यता आहे. त्यामुळे शांतता भंग होण्याचा धोका उद्भवू शकतो. म्हणूनच नागरिकांची सुरक्षा तसेच खाजगी आणि सार्वजनिक मालमत्तेला संरक्षण याकरिता काही पावलं उचलण्यात आल्याचं मुंबई पोलिसांनी सांगितलं आहे.

मुंबई पोलीस डीसीपी, विशाल ठाकूर यांनी जारी केलेल्या अ‍ॅडव्हायझरीमध्ये म्हटले आहे की, भाडेकरूंच्या वेषात दहशतवादी, असामाजिक घटक समाजात धोका निर्माण करणाऱ्या कारवाया, दंगली घडवू नयेत म्हणून घरमालक, भाडेकरूंवर काही नियंत्रण ठेवणे आवश्यक आहे.

मुंबई पोलीस आयुक्तांच्या अखत्यारीत येणाऱ्या कोणत्याही घर, मालमत्तेचा व्यवसाय करणाऱ्या प्रत्येक घरमालक, व्यक्ती ज्याने कोणत्याही व्यक्तीला राहण्याची जागा भाड्याने दिली आहे त्याची माहिती त्वरित सादर करेल. www.mumbaipolice.gov.in या सिटिझन पोर्टलवर सदर भाडेकरूंचे ऑनलाइन तपशील भरावे लागतील.

मुंबई पोलिसांचा हा आदेश 6 जानेवारी 2023 पासून अंमलात येईल आणि 6 मार्चपर्यंत 60 दिवसांच्या कालावधीसाठी लागू होईल. या आदेशाचे उल्लंघन करणारी कोणतीही व्यक्ती भारतीय दंड संहिता, 1860 च्या कलम 188 अंतर्गत शिक्षेस पात्र ठरेल.

नोंदणी कशी कराल?

>> www.mumbaipolice.gov.in येथे मुंबई पोलिसांच्या अधिकृत वेबसाइटला भेट द्या

>> होम पेजवरील रिपोर्ट यू बारवर क्लिक करा.

>> भाडेकरू माहिती टॅबवर क्लिक करा.

>> फॉर्म भरण्यासाठी खाली स्क्रोल करण्यापूर्वी नोट आणि डिस्क्लेमर काळजीपूर्वक वाचा.

>> ऑनलाइन फॉर्म भरा आणि सबमिट करा.

मुंबई पोलिसांच्या अखत्यारीतील स्थानिक पोलिस स्टेशनला भेट देऊन देखील ही प्रक्रिया केली जाऊ शकते.