Mumbai News: मुंबईमध्ये मध्यरात्रीपासून मुसळधार पाऊस (Mumbai Heavy Rainfall) पडत आहे. या पावसामुळे भांडूपमध्ये इमारतीचा स्लॅब कोसळल्याची (Building Slab Collapse) घटना घडली आहे. या घटनेमध्ये पाच वर्षांच्या मुलीचा दुर्दैवी मृत्यू झाला आहे. भांडुपच्या सोनापूर भागामध्ये मध्यरात्रीच्या सुमारास ही घटना घडली आहे. मुंबई महानगर पालिकेकडून (BMC) ही माहिती देण्यात आली आहे.

मिळालेल्या माहितीनुसार, सतत पडणाऱ्या मुसळधार पावसामुळे भांडुपच्या सोनापूर भागात असलेल्या पाच मजली इमारतीचा स्लॅब कोसळला. भांडुपच्या क्रॉस रोडवरील झाकेरिया इमारतीमध्ये ही घटना घडली. चौथ्या मजल्याचा स्लॅब तिसऱ्या मजल्यावर कोसळला. मध्यरात्री तीनच्या सुमारास ही घटना घडली. या इमारतीतील तिसऱ्या मजल्यावरील रुम क्रमांक १०२ मध्ये राहणारी ५ वर्षांची मुलगी तसीन शेख ही गंभीर जखमी झाली.

जखमी झालेल्या तसीन शेखला तिच्या कुटुंबीयांनी तात्काळ उपचारासाठी नजीकच्या एस आर सी रुग्णालयात नेले. पण उपचारादरम्यान पहाटे साडेपाचच्या सुमारास तिचा मृत्यू झाला. तसीनच्या मृत्यूमुळे शेख कुटुंबीयांना मोठा धक्का बसला. या घटनेमुळे शेख यांच्या प्लॅटचे मोठे नुकसान झाले आहे. सतत पडणाऱ्या मुसळधार पावसामुळे स्लॅब कोसळला असावा अशी शक्यता व्यक्त केली जात आहे. या घटनेचा तपास भांडूप पोलिसांकडून सुरु आहे.

दरम्यान, मुंबई आणि मुंबई उपनगरामध्ये मध्यरात्रीपासून मुसळधार पाऊस पडत आहे. या पावसामुळे रेल्वेरुळावर पाणी साचल्यामुळे मुंबईची लाईफलाईन समजली जाणारी लोकलसेवा (Mumbai Local) विस्कळीत झाली आहे. त्याचसोबत मुंबईतील रस्त्यांवर वाहतूक कोंडी झाली आहे. मुंबईतल्या अनेक सखल भागांमध्ये पाणी साचल्याच्या घटना देखील समोर आल्या आहेत. अशामध्ये मुंबईत येत्या ५ दिवसांत मुसळधार पावसाचा इशारा हवामान खात्याने दिला आहे. त्यामुळे मुंबईकरांनी घराबाहेर पडताना काळजी घ्यावी असे आवाहन केले जात आहे.