Kalyan News: कल्याणमध्ये (Kalyan) मद्यपींच्या राड्याच्या घटना दिवसेंदिवस समोर येत आहे. रस्त्यामध्ये दारु पिऊन धिंगाणे करणे, लोकांना त्रास देण्याचे प्रकार अजूनही सुरुच आहेत. अशामध्ये कल्याणच्या कोळसेवाडी परिसरात मद्यपींनी रस्त्यावर धिंगाणा करुन वाहनांची तोडफोड केल्याची धक्कादायक घटना समोर आली आहे. याप्रकरणी कोळसेवाडी पोलिसांनी (Kolasewadi Police) आरोपींविरोधात गुन्हा दाखल करत तपास सुरु केला आहे.

मिळालेल्या माहितीनुसार, कल्याण पूर्वेच्या कोळसेवाडी परिसरात ही घटना घडली आहे. याठिकाणी मद्यपी तरुणांनी भर रस्त्यात शिविगाळ करत 5 ते 6 गाड्यांची तोडफोड केली आहे. मध्यरात्रीच्या सुमारास ही घटना घडली. मद्यपींनी महागड्या चारचाकी गाड्या, रिक्षा आणि दुचाकींची तोडफोड केली आहे. यामुळे गाडी चालकांचे मोठे नुकसान झाले आहे. गाड्यांची तोडफोड का करण्यात आली याचे कारण समजू शकले नाही.

कोळसेवाडी पोलिसांनी याप्रकरणी जयेश डोईफोडे उर्फ टक्या याच्यासह त्याच्या साथीदाराला ताब्यात घेतले आहे. या दोघांविरोधात गुन्हा दाखल करण्याची प्रक्रिया सुरु आहे. जयेश डोईफोडे हा गुन्हेगारी प्रवृत्तीचा असून त्याच्याविरोधात कोळसेवाडी पोलिस ठाण्यात वेगवेगळ्या प्रकरणात गुन्हे दाखल आहेत, अशी माहिती पोलिसांनी दिली. या घटनेचा तपास कोळसेवाडी पोलिसांकडून सुरु आहे. जयेश डोईफोडे याच्या टोळीकडून सतत धिंगाणा सुरु असतो त्यामुळे कोळसेवाडी परिसरातील नागरिक त्रस्त आहेत.