पुणे: एका कामगाराने ऐन दसऱ्याच्या मुहूर्तावर 1 कोटी 18 लाख 66 हजार रुपयांची जबरी चोरी केल्यानं पिंपरी परिसरात एकच खळबळ उडाली आहे. संबंधीत घडलेला प्रकार लक्षात येताच, ज्वेलर्स दुकानाच्या मालकाने त्वरित चिखली पोलीस ठाण्यात गुन्हा दाखल केला आहे. पोलिसांनी या घटनेची गांभीर्याने दखल घेत, आरोपीच्या शोधासाठी पोलीस पथकं रवाना झाली आहेत. या घटनेचा पुढील तपास चिखली पोलीसांच्या वतीने चालू आहे.

मुकेश सोलंकी असं गुन्हा दाखल झालेल्या 30 वर्षीय कामगाराचं नाव असून तो चिखली परिसरातील मोरेवस्ती येथील रहिवासी आहे. पण तो मुळगाव राजस्थानच्या पाली जिल्ह्यात रहिवासी आहे. आरोपी सोलंकी हा चिखली येथील श्री महावीर ज्वेलर्समध्ये सेल्समन म्हणून काम करत होता. दरम्यान शुक्रवारी सायंकाळी साडेपाचच्या सुमारास आरोपीनं दुकानातील तब्बल 1 कोटी 18 लाख 66 हजार रुपयांचा सोनं लंपास केला आहे. याप्रकरणी श्री महावीर ज्वेलर्सचे मालक जितेंद्र अशोक जैन (वय-35, रा. निगडी) यांनी चिखली पोलीस ठाण्यात फिर्याद नोंदवली आहे.

Edited By: Pravin Dhamale