जळगावातून एक धक्कादायक बातमी समोर येत आहे. अहमदाबाद येथील तरूणाने जळगावच्या अमळनेर येथील लॉजवर येऊन आत्महत्या केली आहे. विशेष म्हणजे आत्महत्या करण्याआधी त्याने आपल्या प्रेयसीला व्हिडिओ कॉल केला होता. या प्रकरणाची माहिती पोलिसांना मिळाल्यानंतर त्यांनी तपास करून पोलीस ठाण्यात आकस्मिक मृत्यूची नोंद केली आहे. या घटनेनंतर परिसरात एकच खळबळ उडाली आहे.

मिळालेल्या प्राथमिक माहितीनुसार, सौरभ शर्मा असे मृत तरूणाचे नाव आहे. हा तरुण अहमदाबाद येथील रहिवासी होता. पोलिसांनी दिलेल्या माहितीनुसार, सौरभ याच्याविरुद्ध अहमदाबाद येथे पोक्सो कायद्यांतर्गत गुन्हा दाखल आहे. मृत तरूण आधी अहमदाबाद येथून जळगावच्या अमळनेरमध्ये गेला.

नंतर अमळनेर येथील बस स्थानकाजवळील लॉजवर गेला. लॉजवर गेल्यानंतर तरूणाने आपल्या प्रेयसीला व्हिडिओ कॉल केला. नंतर रूममध्येच त्याने गळफास घेत आत्महत्या केली. घटनेची माहिती मिळताच पोलिसांनी घटनास्थळी दाखल होत तरुणाचा मृतदेह ताब्यात घेतला. तसेच शासकीय रूग्णालयात नेले.

तसेच मृतदेह शवविच्छेदनासाठी पाठवले. या प्रकरणी अमळनेर पोलीस ठाण्यात अकस्मिक मृत्यूची नोंद करण्यात आली असून पुढील तपास सुरू आहे. या घटनेने स्थानिक परिसरात खळबळ उडाली असून, आत्महत्येमागील नेमके कारण काय होते याचा शोध पोलीस घेत आहेत.