विश्वभूषण लिमये/साम टीव्ही न्यूज

दक्षिण सोलापुर तालुक्यातील मुस्ती-संगदरी शिवारात गावचा विद्युत पुरवठा बंद असल्याने पोलवर चढून विद्युत फिडर बंद करताना महावितरण कर्मचाऱ्याची चूक झाली अन् डीपीवर चढलेल्या मुस्ती गावाच्या तरुणाचा ११ हजार वोल्ट विजेच्या धक्क्याने जागीच मृत्यू झाला आहे. ३५ फूटावर त्या तरुणाचा मृतदेह लोबंकाळत राहिला. कुमार तानाजी घाटगे असे मृत तरुणाचे नाव आहे.

संगदरी-मुस्ती गावांना विजपुरवठा करण्यासाठी दोन डीपी (ट्रान्सफार्मर ) आहेत. यातील मुस्ती गावाचे काही फीडर संगदरी गावाच्या डीपीवर घेतले होते. ही बाब महावितरण कर्मचाऱ्याच्या लक्षात आली नाही. त्याने मुस्ती गावाची लाईट बंद केली आणि संगदरी गावाच्या डीपीवर या तरुणाला चढविले आणि परिणामी या तरुणाचा शॉक लागून मृत्यू झाला.

कुमार घाटगे हा अविवाहित होता. तिघे भाऊ असलेल्या कुटुंबातील कुमार हा सर्वात लहान भाऊ होता. त्याला महावितरणाच्या कामाचा काहीसा अनुभव होता. आपल्या गावाची लाईट कशी काय गेली, गावच्या डीपीत काय बिघाड झाला आहे हे पाहण्यासाठी तो डीपीवर चढला आणि त्यात त्याचा दुर्दैवी मृत्यू झाला आहे.

डीपीवर चढल्यावर विजेचा शॉक लागून मृत्यू होऊ शकतो, याची माहिती असताना देखील महावितरणाचा कर्मचारी जमादार याने कुमार घाटगेला डीपीवर चढविले यामध्ये त्याचा मृत्यू झाला. याप्रकरणी लाईनमन जमादार याच्यावर वळसंग पोलिसांत गुन्हा दाखल झाला आहे.