नाशिक : टेक्नोलॉजीमुळे मानवाचं जीनव काहीसं सोपं झालं आहे. अनेक गॅजेटमुळे आपली कामं सोपी होतात, मनोरंजन होतं. मात्र माणसांकडून टेक्नोलॉजीच्या चुकीच्या वापरामुळे दुष्परिणामही भोगावे लागत आहे. अशीच एक घटना नाशिकच्या इगतपुरीतून समोर आली आहे. हेडफोन लावून रस्ताने जाणाऱ्या तरुणीचा अपघातात मृत्यू झाला आहे.

प्रियांक असं मृत मुलीचं नाव आहे. मिळालेल्या माहितीनुसार, प्रियांका कॉलेजमधून हेडफोन लावून मोबाईलवर बोलत घरी निघाली होती. जानोरी येथील रेल्वे फाटकाजवळ कानात हेडफोन असल्याने मागून येत असलेल्या रेल्वेचा तिला आवाजच ऐकू आला नाही. यामुळे ट्रेनच्या धडकेत प्रियांकाचा दुर्देवी मृत्यू झाला आहे.

पहिली गोष्ट म्हणजे रेल्वे फाटक ओलांडताना दोन्ही बाजूने ट्रेन येत आहे की नाही याकडे लक्ष दिलं पाहिजे. मात्र कानत हेडफोन लावल्याने आणि फोनवर बोलत असल्याने ट्रेनबाबत तिचा अंदाज चुकला.

हेडफोन लावून गाडी चालवू नये किंवा रस्त्याने चालताना कानात हेडफोन लावू नये असे वारंवार सांगितलं जातं. यामुळे याआधीही अनेक अपघात झाल्याचं दिसून आलं आहे. मात्र तरीही लोक याकडे दुर्लक्ष करतात. म्हणूनच असे अपघात होतात. त्यामुळे हेडफोन वापराबाबत काही नियम स्वत:ला घालून घेण्याची सध्या गरज आहे.