फय्याज शेख, साम टीव्ही, प्रतिनिधी

Accident News : भिवंडीमधून एक दु:खद घटना घडली. कामाहून घरी परतताना एका तरुण इंजिनिअरच्या दुचाकीला ट्रकने जोरात धडक मारली. अपघातामध्ये इंजिनिअरचा ट्रकखाली चिरडून जागीच मृत्यू झाला. ही घटना भिवंडीतील चाविंद्रा-वडपे मार्गावर घडली आहे. घटनेच्या सीसीटीव्ही फुटेजचा व्हिडीओ व्हायरल होत आहे.

मिळालेल्या माहितीनुसार, भिवंडीमधील चाविंद्रा-वडपे मार्गावर भीषण अपघात झाला. हा अपघात निंबवली नाका परिसरात झालेल्या अपघातामध्ये तरुण इंजिनिअरचा जागीच मृत्यू झाला. मृत्यू झालेल्या तरुणाची ओळख विनोद पाटील (वय २९ वर्षे, रा. कशेळी) अशी झाली आहे. तो वाशिंद येथील एका खासगी कंपनीमध्ये इंजिनिअर म्हणून कार्यरत होता.

नेहमीप्रमाणे काम संपवून विनोद घरी जाण्यासाठी निघाला होता. रस्त्यात ट्रक आणि त्याच्या दुचाकीमध्ये जोरदार धडक झाली. धडकेमध्ये विनोद पाटील ट्रकखाली चिरडला जाऊन जागीच ठार झाला. या घटनेचा सीसीटीव्ही व्हिडीओ आता समोर आला आहे. सविस्तर सीसीटीव्ही व्हिडीओच्या आधारे पोलीस पुढील तपास करत आहेत.

अपघाताच्या घटनेनंतर परिसरात मोठी खळबळ उडाली. स्थानिक नागरिकांनी अपघाताची माहिती दिली. संपर्क केल्यानंतर भिवंडी तालुका पोलीस देखील तात्काळ घटनास्थळी दाखल झाले. पोलिसांनी पंचनामा करत इंजिनिअरचा मृतदेह ताब्यात घेतला आणि शवविच्छेदनासाठी इंदिरा गांधी रुग्णालयात पाठवला. या अपघाताचा सविस्तर तपास पोलीस करत आहेत.