वर्धा: वर्ध्याच्या न्यायालय (Wardha Court) परिसरात महिला वकीलावर चाकू हल्ला झाल्याची घटना काल घडली होती. या घटनेनंतर न्यायालय परिसरात कडेकोट सुरक्षा वाढविण्यात आली आहे. न्यायालयाच्या दारावरच मेटल डिटेक्टर लावण्यात आले आणि पोलीस देखील तैनात करण्यात आले होते. यावेळी न्यायालयात येणाऱ्या प्रत्येकाची मेटल डिटेक्टरने तपासणी केली जात असतानाच एकाच्या खिशात धारदार चाकू आढळून आला आहे. चाकू सापडल्याने पुन्हा कोर्ट परिसरात खळबळ निर्माण झाली आहे.

वर्ध्याच्या न्यायालय परिसरात नेहमीप्रमाणे आज कामकाज सुरू झाले. काल मंगळवारच्या चाकू हल्ल्याच्या घटनेनंतर सुरक्षा वाढविली. यावेळी प्रत्येकाला तापसणी करून न्यायालयात सोडले जात होते. यात कर्मचारी आणि वकिलांचा देखील समावेश होता. दरम्यान दुपारच्या सुमारास वर्ध्याच्या आनंद नगर येथील दोघे न्यायालयात आले.

एकाने मेटल डिटेक्टर वर तापसणी करून आत प्रवेश केला. पण दुसरा आनंद नगर येथील प्रज्वल पाझारे याने मात्र ही तपासणी करण्यासाठी टाळाटाळ केली. यावेळी त्याने पळ काढताच नियुक्त असलेले पोलीस शिपाई अभिनंदन लाउत्रे यांनी त्याचा पाठलाग करून त्याला ताब्यात घेतले. त्याची तपासणी करण्यात आली. त्याच्याकडे खिश्यात धारदार चाकू आढळून आला. पोलिसांनी त्याला शहर पोलिसांच्या स्वाधीन केले आहे. त्याच्यावर हत्यार कायद्यांतर्गत कारवाई केली जात आहे.