संजय राठोड, साम टीव्ही

Yavatmal Accident News

मॉर्निंग वॉकसाठी गेलेल्या दोन व्यक्तींना भरधाव वाहनाने जबर धडक दिली. ही धडक इतकी भीषण होती, की यामध्ये दोघांचाही जागीच मृत्यू झाला. थरकाप उडवणारी ही घटना यवतमाळ जिल्ह्यातील पुसद तालुक्यातल्या मांडवा गावात घडली. सुधाकर आडे आणि नरेंद्र धाड अशी घटनेतील मृतकांची नावे आहेत. या घटनेनं परिसरातून हळहळ व्यक्त होत आहे. ('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

याप्रकरणी पोलिसांनी (Police) वाहन चालकाविरुद्ध गुन्हा दाखल केला असून त्याला अटक केली आहे. मिळालेल्या माहितीनुसार, पुसद तालुक्यातील मांडवा गावाचे माजी सरपंच सुधाकर आडे (वय ५८) आणि शिक्षक नरेंद्र नामदेव धाड (वय ५०) दररोज सकाळी मॉर्निंग वॉकला जात होते.

गुरुवारी पहाटेच्या सुमारास दोघेही नेहमीप्रमाणे मॉर्निंग वॉकसाठी (Yavatmal News) घराबाहेर पडले. मांडवा गावातील हनुमान परिसरात ते आले असता, भरधाव वेगाने प्रवासी घेऊन जाणार्‍या एका मॅजिक वाहनाने त्यांना जोरदार धडक दिली. या धडकेत दोघेही गंभीर जखमी झाले. दरम्यान, परिसरातील नागरिकांनी दोघांनाही तातडीने रुग्णालयात दाखल केले.

मात्र, रुग्णालयात जाण्याआधीच त्यांचा मृत्यू झाला होता. नरेंद्र धाड हे उमरखेड तालुक्यातील मुळावा येथील सम्यक दृष्टी विद्यालयात शिक्षक म्हणून कार्यरत होते. त्यांच्या अपघाती निधनाने परिसरात शोककळा पसरली आहे. याप्रकरणी पोलिसांनी वाहनचालकाला ताब्यात घेतलं असून त्याच्यावर गुन्हा दाखल केला आहे.