-- संजय राठोड

यवतमाळ : पारधी समाज म्हटलं की रानावनात भटकून शिकार करून उदर निर्वाह करणारा उपेक्षित समाज डोळ्यासमोर उभा राहतो. कुठं तरी बेड्यावर निर्वासित जीवन जगणाऱ्या या समाजाला मुख्य प्रवाहात आणण्यासाठी विविध प्रयत्न सुरू असतात. हल्ली या समाजात शैक्षणिक जनजागृती सुद्धा मोठ्या प्रमाणात होताना दिसून येत आहे.

हे देखील पहा :

मात्र, हा समाज राजकीय प्रवाहापासून कोसो दूरच आहे. मात्र, यवतमाळ (Yavatmal) जिल्ह्यातील कळंब (Kalamb) नगरपंचायत निवडणुकीत (Nagar Panchayat) प्रभाग क्रमांक ११ मधून पारधी समाजाचा विजय चव्हाण (वय २४ वर्षे) या युवकाने सर्व राजकीय प्रस्थापितांना मागे टाकत विजय मिळवला आहे. शिवसेनेकडून (Shivsena) विजय चव्हाण याला उमेदवारी देण्यात आली होती. निवडणूक आखाड्यात उतरल्यानंतर विरोधकांकडून या नवख्या उमेदवाराला पराभूत करण्याचे अनेक प्रयत्न झाले.

मात्र, विजय चव्हाण ने भाजपचे (BJP) सतीश मरापे आणि काँग्रेसचे (Congress) विष्णू उईके यांना चारही मुंड्या चीत करित विजय मिळवला. विजय चव्हाण यांना ३२१ मते पडली. तर, भाजपचे सतीश मरापेंना १७४ आणि काँग्रेसचे विष्णू उईकेंना १५९ मते मिळाली. दरम्यान, विजय चव्हाण या पारधी समाजाच्या युवकाने निवडणूकीत बाजी मारल्याने त्याचे सर्वत्र कौतुक होत असून त्याच्या विजयाची सर्वदूर चर्चा होत आहे.

Edited By : Krushnarav Sathe