संजय राठोड, साम टीव्ही

यवतमाळमधून मुंबईकडे जाणाऱ्या ट्रॅव्हल्स बस आणि कंटेनरचा भीषण अपघात झाला. या भीषण अपघातात आठ जण जखमी झाल्याची घटना घडली. त्यांना तातडीने जवळील रुग्णालयात दाखल करण्यात आलं आहे.

मिळालेल्या माहितीनुसार, यवतमाळच्या महागांव तालुक्यातील काळी-दौलत येथून मुंबईकडे जाणाऱ्या ट्रॅव्हल्स बस आणि समोरून येणाऱ्या कंटेनरनची समोरासमोर जोरदार धडक झाली. त्यामुळे या भीषण अपघातात आठ जण जखमी झाल्याची घटना घडली.

ट्रॅव्हल्स बस आणि कंटेनरचे दोन्ही चालक या अपघातात गंभीर जखमी झाले. त्यांना पुसद उपजिल्हा रूग्णालयात उपचारासाठी दाखल करण्यात आलं आहे. हा अपघात एवढा भीषण होता की, यात दोन्ही वाहनाच्या कॅबिनचा अक्षरशः चुराडा झाला आहे. या अपघातामुळे काही वेळेसाठी वाहतूक ठप्प झाली होती.

नंदूरबारमध्ये भीषण अपघात

नंदूरबार शहरातील नेहरू पुतळा परिसरात भरधाव वेगातील टॅक्सी चालकाचं वाहनावरील नियंत्रण सुटलं. त्यानंतर रस्त्याच्या कडेला उभे असलेल्या दुचाकींना धडक देत टॅक्सीने रस्त्यावर चालणाऱ्या देखील काही वाहनांना धडक दिली.

या अपघातात 5 दुचाकी चालक गंभीरित्या जखमी झाले. तर जखमींना खासगी रुग्णालयात उपचारासाठी दाखल करण्यात आलं आहे. टॅक्सी शहर पोलीस ठाण्यात जमा करण्यात आली आहे. या चालकाविरुद्ध अपघाताचा गुन्हा दाखल करण्याचे काम सुरू आहे.