सोळा वर्षीय कर्णबधीर मुलीवर एका २० वर्षीय तरूणानं लग्नाचे आमिष दाखवून लैंगिक अत्याचार केला आहे. ही धक्कादायक घटना यवतमाळच्या घाटंजी तालुक्यातील पारवा पोलीस ठाणे परिसरात घडली आहे. या घटनेनंतर पोलिसांनी आरोपीवर गुन्हा दाखल केला असून, त्याला अटक करण्यात आली आहे. या घटनेनंतर परिसरातील नागरीकांनी रोष व्यक्त केलाय. क्षणार्थ ही घटना गावात वाऱ्यासारखी पसरली आहे.

यवतमाळच्या घाटंजी तालुक्यातील पारवा पोलीस स्टेशन अंतर्गत येणाऱ्या एका गावात धक्कादायक घटना घडली आहे. एका सोळा वर्षीय कर्णबधिर मुलीवर एका २० वर्षीय तरूणानं लैंगिक अत्याचार केला आहे. मुख्य म्हणजे अल्पवयीन मुलगी गर्भवती असल्याची बाब समोर आली आहे. मुलीची बदनामी होऊ नये म्हणून पीडित मुलीच्या पालकांनी ही बाब उघडकीस आणली नव्हती. मात्र, मुलीला रूग्णालयात दाखल केल्यानंतर घडलेला सर्व प्रकार उघडकीस आला.

नेमकं प्रकरण काय?

गावातील एका २० वर्षीय मुलानं आधी कर्णबधिर अल्पवयीन मुलीला प्रेमाच्या जाळ्यात ओढलं. नंतर लग्नाचे आमिष दाखवून तिच्यावर लैंगिक अत्याचार केला. आरोपी तरूण वारंवार अल्पवयीन मुलीवर लैंगिक अत्याचार करत होता. मात्र, जेव्हा पीडित मुलीला वेदना झाल्या, तब्येत बिघडली तेव्हा तिला रूग्णालयात दाखल करण्यात आलं. तेव्हा अल्पवयीन मुलगी गर्भवती असल्याचं समोर आलं.

मुलीची बदनामी होऊ नये यासाठी पालकांनी एक महिने ही बाब लपवली होती. मात्र, मुलगी गरोदर असल्याची बाब समोर आल्यानंतर पोलिसांनी पीडित मुलीच्या कुटुंबाला विश्वासात घेऊन तक्रार नोंदवून घेतली. त्यानंतर पोलिसांनी आरोपीला अटक केली. तसेच आरोपीविरुद्ध पॉक्सोसह विविध कलमान्वये गुन्हे दाखल केले आहेत. या प्रकरणी पुढील तपास पांढरकवडा पोलीस उपविभागीय अधिकारी आणि पारवा ठाणेदार हे करीत आहेत.