नवनीत तापडिया

Chhatrapati Sambhajinagar News : छत्रपती संभाजीनगरमधून एक धक्कादायक घटना समोर आली आहे. चालत्या ट्रकमधून महिलेला फेकल्याची घटना करोडी गावाजवळ घडली आहे. पोलिसांना ट्रक ड्रायव्हरला अटक केली आहे.

पोलिसांनी दिलेल्या माहितीवरून करोडी गावाजवळ रिंग रोडवर एका ट्रकमधून महिलेला फेकून दिल्याची माहिती करोडी गावचे उपसरपंच सोमनाथ नवले यांनी शनिवारी दौलताबाद  पोलीस यांना दिली होती. माहिती मिळताच पोलिसांनी घटनास्थळी धाव घेऊन जखमी अवस्थेत असलेल्या महिलेला उपचारासाठी घाटी रुग्णालयात दाखल केले.

यानंतर आजूबाजूला सदर घटनेबाबत विचारपूस केले असता एका पानटपरी चालकाने माहिती दिली की, ही घटना त्या ट्रकच्या पाठीमागे असलेल्या एका कार चालकाने बघितली. त्याने ट्रकचा क्रमांक पान टपरी चालकाजवळ लिहून ठेवला होता. (Maharashtra News)

पोलिसांनी त्याआधारे शोध सुरू केला असून ट्रॅफिक पोलिसांनी ट्रकची सविस्तर माहिती दिली. ट्रक मालकाकडे चौकशी केली असता त्याने जीपीएसद्वारे ट्रकच्या लोकेशनची माहिती पोलिसांना दिली. त्याआधारे त्याच क्रमांकाचा ट्रक बीड रोडवर झालटा फाटा येथे दिसला. पोलिसांनी पाठलाग करत ट्रक पकडला. (Latest Marathi News)

ट्रक चालकाचे नाव भानुप्रसाद दुगलाल गौतम असून तो उत्तर प्रदेशचा रहिवाशी आहे. ड्रायव्हरने दिलेल्या माहितीनुसार, त्या महिलेला त्याने कोपरगाव येथून बसवले होते. मात्र त्याने असं का केलं याची माहिती अद्याप समोर आलेली नाही. दौलताबाद पोलीस स्टेशनमध्ये ट्रक चालकविरुद्ध जीवे ठार मारण्याचा उद्देशाने प्रयत्न केले असल्याचा गुन्हा दाखल करण्यात आले आहे. पोलीस अधिक तपास करत आहेत.