why Congress decided to contest Mumbai BMC elections alone : मनसेच्या एण्ट्रीने महाविकास आघाडीत बिघाडी झालीय.. आधीच बिहारमध्ये धुळधाण उडाली असतानाही काँग्रेसने मुंबई महापालिकेसाठी स्वबळाचा नारा दिलाय.. यावरचा हा स्पेशल रिपोर्ट...

महाराष्ट्रापाठोपाठ बिहारमध्येही महाआघाडीचं पानिपत झालं... काँग्रेसला तर दोन अंकी जागाही जिंकता आल्या नाहीत..त्यामुळे काँग्रेसवर टीकेची झोड उठलीय... त्याच दरम्यान काँग्रेसनं मात्र ठाकरेंची साथ सोडत मुंबई महापालिका निवडणूक स्वबळावर लढण्याचा नारा दिलाय..

खरं तर हिंदी सक्तीच्या विरोधात राज ठाकरे आणि उद्धव ठाकरे एकत्र आले...तेव्हापासूनच काँग्रेसने ठाकरेपासून अंतर राखायला सुरुवात केली.. मात्र व्होटचोरीच्या मुद्द्यावर मनसेसह महाविकास आघाडीने एकत्र मोर्चा काढला.. त्यामुळे पुन्हा युतीच्या चर्चांनी जोर धरला... असं असताना काँग्रेसच्या एकदिवसीय शिबिरात स्वबळाचा नारा दिलाय.. एवढंच नाही तर मनसेच्या खळ्ळखट्याक स्टाईलमुळेच मनसेसोबत युती करणार नसल्याचं काँग्रेसनं स्पष्ट केलंय.. तर ठाकरेंना सोडण्याचं वेगळंच कारण असल्याचा टोला ठाकरेसेनेनं लगावलाय..

दुसरीकडे मात्र अजूनही राज्यातल्या काँग्रेस नेत्यांमध्ये आघाडीबाबत संभ्रमाचं वातावरण असल्याचं दिसतंय. ठाकरे बंधूंकडून आघाडीचा प्रस्ताव आला नसल्याचं विधान काँग्रेस नेते विजय वडेट्टीवारांनी केलंय

लोकसभा निवडणुकीत काँग्रेसला आघाडीचा फायदा झाला... मात्र मुंबईचं गणित लक्षात घेता ठाकरेंमुळे परप्रांतिय मतदार दुरावण्याच्या भीतीमुळेच काँग्रेसनं स्वबळाचा नारा दिल्याची चर्चा आहे.. मात्र स्वबळ अजमावणारी काँग्रेस मुंबई महापालिकेत आपला प्रभाव दाखवणार की घसरणीचा पाढा कायम ठेवणार? याचीच उत्सुकता आहे...