भारतीय राष्ट्रीय महासागर माहिती सेवा केंद्राकडून सिंधुदुर्ग, रत्नागिरी, ठाणे, मुंबई शहर, मुंबई उपनगर जिल्ह्यांच्या किनारपट्टीवर उद्या उंच लाटा उसळतील असा इशारा देण्यात आलाय. या लाटा ३.६ ते ४.३ मीटर उंच असणार आहेत. २३ जुलै २०२५ रोजी सायंकाळी ५.३० पासून ते २४ जुलै २०२५ रात्रौ ८.३०पर्यंत लाट उसळतील. त्याचप्रमाणे पालघर आणि रायगड जिल्ह्यांच्या किनारपट्टीला २४ जुलै २०२५ रोजीचे रात्री ८.३० वाजेपर्यंत ३.४ ते ३.८ मीटर उंच उसळतील असा इशारा देण्यात आलाय. त्यामुळे लहान होड्यांना समुद्रास न जाण्याच्या सूचना देण्यात आल्या आहेत, अशी माहिती राज्य आपत्कालीन कार्य केंद्राकडून देण्यात आली. (IMD Issues Orange Alert High Waves and Dangerous Conditions Predicted Along Maharashtra’s Konkan Coast)

रायगड, रत्नागिरी, सिंधुदुर्ग या जिल्ह्यांमध्ये तसेच सातारा घाट, कोल्हापूर घाट या भागात पुढील २४ तासासाठी ऑरेंज अलर्ट देण्यात आलाय. अलर्ट देण्यात आल्यानं जिल्हा प्रशासनाला सतर्क राहण्याच्या सूचना आहेत. आपत्तीच्या अनुषंगाने राष्ट्रीय आपत्ती प्रतिसाद दल आणि राज्य आपत्ती प्रतिसाद दल यांनाही आपत्कालीन परिस्थितीत सतर्क राहण्याच्या सूचना देण्यात आलेल्या आहेत.

परभणी जिल्ह्यातील पाथरी तालुक्यात ११७.८ मी.मी. पाऊस झाला. या पावसामुळे मौजे हदगाव नखाते, येथील सात ते आठ जण पुराच्या पाण्यात अडकले. पुराच्या पाण्यापासून जीव वाचण्यासाठी ते घराच्या छतावर जाऊन बसले होते. आपत्ती व्यवस्थापन बचाव पथकाने त्यांना सुखरूप बाहेर काढले. तसेच बाधित नागरिकांना सुखरूप सुरक्षित स्थळी हलविण्यात आले असून परिस्थिती नियंत्रणात आहे.

अतिवृष्टीमुळे हिंगोली जिल्ह्यातील सेनगाव तालुक्यातील मौजे बरडा येथेही तीनजण पुराच्या पाण्यात अडकले होते. मंदिराच्या चहु बाजुने पाणी भरले होते. त्या नागरिकांनी जीव वाचवण्यासाठी मंदिराचा आसरा घेतला होता. स्थानिक बचाव पथकाने त्यांची सुटका केली आणि त्यांना सुरक्षित स्थळी हलविण्यात आले. येथील परिस्थिती नियंत्रणात असल्याचेही राज्य आपत्कालीन कार्य केंद्राकडून कळविण्यात आले आहे.