- विश्वभूषण लिमये / संदीप भाेसले

सोलापूर जिल्ह्यात पाणीटंचाईची दाहकता दिवसेंदिवस वाढत चालली आहे. सध्या सोलापूर जिल्ह्यातील १४३ गावांसह ९९१ वाड्या- वस्त्यांवरील ३ लाख ९८ हजार ६८४ बाधित लोकसंख्येला २०० टँकरने पाणीपुरवठा होत असल्याची माहिती सामोर आली आहे. दरम्यान लातूर शहराला पाणीपुरवठा करणाऱ्या मांजरा धरणामध्ये आता केवळ 0.86 टक्के इतकाच पाणीसाठा शिल्लक राहिला आहे. (Maharashtra News)

दरम्यान मागील वर्षी समाधानकारक पाऊस न पडल्याने उजनीसह अन्य धरणाच्या पाणीपातळी खालावली आहे. याशिवाय विहिरी कोरड्या पडल्याने अनेक गावांना पाणी टंचाईचा सामना करावा लागत आहे.

पाणीच मिळत नसल्याने नागरिकांना भटकंती करावी लागत आहे. जिल्हा परिषदेच्या अनेक पाणीपुरवठा योजना बंद पडल्याने अनेक गावांना पाण्याची कमतरता भासत आहे. दरम्यान सध्या 200 टॅंकर्सच्या माध्यमातून नागरिकांना पाणी पूरविले जात आहे.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

लातूरच्या मांजरा धरणात अल्प प्रमाणात पाणी

लातूर जिल्ह्यात देखील दिवसेंदिवस पाणीटंचाईची दाहकता वाढू लागली आहे. संपूर्ण लातूर शहराला पाणीपुरवठा करणाऱ्या मांजरा धरणामध्ये आता केवळ 0.86 टक्के इतकाच पाणीसाठा शिल्लक राहिला आहे.

दरम्यान याच मांजरा धरणातून बीड जिल्ह्यातील अंबाजोगाई ,केज,धारूर तसेच धाराशिव जिल्ह्यातील कळंब, शिराढोण यासह लातूर शहराला पाणीपुरवठा करण्यात येतो. मात्र आता या धरणात मृत अवस्थेत पाणीसाठा असल्याने मांजरा धरणावर अवलंबून असणाऱ्या शहरांची आणि गावांची चिंता वाढली आहे.

Edited By : Siddharth Latkar