मनोज जयस्वाल 
वाशीम : मुक्या जनावरांची अवैधपणे वाहतूक केली जात असल्याचा प्रकार पुन्हा एकदा समोर आला आहे. समृद्धी महामार्गावर नागपूरकडून येणाऱ्या वाशिमच्या कारंजा येथील टोल प्लाझावर हा प्रकार उघडकीस आला असून कारंजा पोलिसांमुळे ट्रकमध्ये कोंबून वाहतूक केल्या जाणाऱ्या २७ बैलांची सुटका करण्यात आली आहे. मात्र यात चार बैलांचा मृत्यू झाला आहे. 

समृद्धी महामार्गावरून नागपूरच्या दिशेने येणाऱ्या ट्रकमध्ये ३१ बैल निर्दयतेने कोंबून वाहतूक केली जात होती. दरम्यान ट्रक कारंजा येथील टोल प्लाझावर आला असता पोलिसांनी मध्य प्रदेशचा क्रमांक असलेल्या या ट्रकला तपासणी करण्याकरता पोलीसानी थांबविण्याचा प्रयत्न केला. मात्र सदरचा ट्रक टोल नाक्याचा दांडा तोडून कारंजा शहराकडे भरधाव वेगाने घेऊन मार्गस्थ झाला. यावेळी पोलिसांनी त्याचा पाठलाग केला. 

पाठलाग करत पकडला ट्रक 

कारंजा पोलिसांनी त्याचा पाठलाग करत काही अंतरावर जाऊन ट्रक पुढे थांबवून तपासणी केली. त्यात ३१ बैल निर्दयतेने कोंबलेले दिसून आले. दरम्यान यात ४ बैल मृतावस्थेत आढळून आल्याचा प्रकार उघडकीस आला. यावेळी कारंजा पोलिसांनी संशयित आरोपीकडून १० लाख रुपये किमतीचा ट्रक आणि ४ लाख ६५ हजार किमतीचे बैल असा एकूण १४ लाख ६५ हजारांचा मुद्देमाल जप्त केला.

२७ बैलांना दिले पांझरापोळ संस्थेच्या ताब्यात 
दरम्यान या प्रकरणी पोलीस उपनिरीक्षक गजानन कळणाजी पत्रे यांच्या फिर्यादीवरून आरोपी आयुब अली कुदरत अली (रा. मोती नगर  नवीन जेल रोड भोपाल मध्य प्रदेश) याचे विरुद्ध गुन्हा दाखल करण्यात आला. तर ट्रकमधील बैलांना ताब्यात घेऊन कारंजा येथील पशुवैद्यकीय दवाखान्यामध्ये वैद्यकीय अधिकाऱ्यांकडून २७ जिवंत बैलांचे मेडिकल व चार मृत जनावरांचे शवविच्छेदन करण्यात आले. जिवंत २७ बैलांना सुरक्षित स्थळी ठेवण्याकरिता पांजरपोळ गोरक्षण संस्था पलाना येथे रामकृष्ण भोलाराम ठाकूर यांच्या ताब्यात देण्यात आले.