पुणे : राज्याच्या विविध भागांत पुढील ४ दिवस विजांच्या कडकडाटासह जोरदार पाऊस पडण्याचा अंदाज वर्तवण्यात आला आहे. मध्य महाराष्ट्र आणि कोकणात तुरळक ठिकाणी मुसळधार पावसासाठी पोषक वातावरण असल्याचे हवामान विभागाच्यावतीने सांगण्यात आले आहे. ओमानकडे गेलेल्या ‘शाहीन’ चक्रीवादळाची तीव्रता भारतात सध्या कमी प्रमाणात होत आहे.

हे देखील पहा-

बिहार आणि उत्तर प्रदेश परिसरात चक्राकार वारे वाहत आहेत. तसेच नैऋत्य बंगालचे उपसागर आणि तमिळनाडूच्या किनाऱ्यालगत चक्राकार वाऱ्यांची स्थिती आहे. केरळ आणि तमिळनाडू किनारपट्टीपासून लक्षद्वीप बेटांपर्यंत हवेचा कमी प्रमाणात दाबाचा पट्टा आहे. परिणामी येत्या ८ ऑक्टोबरपर्यंत कोकण आणि महाराष्ट्रात पावसाचा जोर वाढण्याची शक्यता वर्तवण्यात आली आहे.

मराठवाड्यात मेघगर्जनेसह, तर विदर्भात काही ठिकाणी पाऊस पडणार आहे. पुणे शहर परिसरात जोरदार पाऊस झाला. दुपारपर्यंत ऊन आणि सायंकाळी अचानक झालेल्या मुसळधार पावसामुळे अनेक ठिकाणी रस्त्यांवर पाणी साचून वाहतूक कोंडी झाल्याचे चित्र बघायला मिळले आहे. तसेच नागरिकांची तारांबळ देखील मोठ्या प्रमाणात उडाली होती. दरम्यान, पुढील ४ दिवस शहरात दुपारनंतर ढगाळ वातावरण, विजांच्या कडकडाटासह हलक्या ते मध्यम स्वरूपाच्या पावसाची शक्यता वर्तवण्यात आली आहे. तसेच घाट परिसरात तुरळक ठिकाणी मुसळधार पावसाची शक्यता हवामान खात्याने वर्तवली आहे.

Edited By- Digambar Jadhav