चेतन व्यास, वर्धा | साम टीव्ही

धावत्या दुचाकीवर वीज कोसळून बापलेकाचा करूण अंत झाला. तर त्यांच्यासोबत असलेल्या पुतण्याची मृत्यूशी झुंज सुरू आहे. वर्धा येथील सोनेगाव अल्लीपूर रस्त्यावर धोत्रा चौरस्ता येथे ही घटना घडली. हे तिघेही दुचाकीवरून आपल्या घरी परतत होते. ही घटना आज, शुक्रवारी संध्याकाळी सव्वासातच्या सुमारास घडली.

वर्ध्याच्या सोनेगाव-अल्लीपूर रस्त्यावर धोत्रा चौरस्ता येथे ही दुर्दैवी घटना घडली. वडील, मुलगा आणि पुतण्या हे तिघे दुचाकीवरून आपल्या गावाकडे परतत होते. त्याचवेळी या तिघांच्या अंगावर वीज कोसळली. धावत्या दुचाकीवर वीज कोसळून त्यात वडील आणि मुलाचा मृत्यू झाला. तर पुतण्या गंभीर जखमी आहे. हिंगणघाटच्या उपजिल्हा रुग्णालयात तो मृत्युंशी झुंज देत असल्याची माहिती आहे.

भिवापूर येथील अनिल ठाकरे हे आपला सतरा वर्षीय मुलगा वेदांत ठाकरे व पुतण्या सौरभ ठाकरे याच्यासोबत भर पावसात सोनेगाव मार्गाने आपल्या दुचाकीवरून भिवापूर गावाकडे निघाले होते. धोत्रा चौरस्ता येथे अचानक दुचाकीवर वीज कोसळली. यात वडील अनिल ठाकरे आणि मुलगा वेदांत ठाकरे हे जागीच ठार झाले. पुतण्या सौरभ ठाकरे हा गंभीर जखमी झाला आहे. त्याला हिंगणघाट येथील उपजिल्हा रुग्णालयात दाखल करण्यात आले आहे. त्याच्यावर उपचार सुरू असून मृत्यूशी झुंज देत आहे.