नवीन आणलेल्या डीजेची तपासणी करण्यासाठी मुख्यवाहीनी वरून थेट विद्युत पुरवठा करण्याचा प्रयत्न केला, पण जोराचा विद्युत धक्का बसल्याने दोघांचा जागीच मृत्यू झाला. ही घटना सालोड (हिरापूर) येथे रात्रीला घडली असून, रविवारी सकाळी उघडकीस आली. या घटनेने गावात एकच खळबळ उडाली आहे.सूरज चिंदूजी बावणे (२७), सेजल किशोर बावणे (१३, दोन्ही रा. सालोड (हिरापूर), अशी मृतांची नावे आहेत.

नवीन डीजे व धमाल पार्टी तयार केली असून, आता सोमवारी जन्माष्टमी असल्याने त्याची ऑर्डर होती. त्यामुळे नव्याने आणलेल्या डीजेची तपासणी करण्यासाठी सेटअप तयार करून विद्युत जोडणी सुरू केली. याकरिता विद्युत तारांवरून थेट विद्युत पुरवठा घेण्याच्या प्रयत्नात असतानाच सूरज व सेजल या दोघांना जबर धक्का बसला. दोघेही विद्युत तारांना चिकटल्याने त्यांचा जागीच मृत्यू झाला. दोघेही रात्रभर तारांना चिकटलेल्या अवस्थेतच राहिले. सकाळी घरच्यांच्या लक्षात आल्याने खळबळ उडाली असून, याप्रकरणी सावंगी पोलिसांत आकस्मिक मृत्यूची नोंद केली आहे.