चेतन व्यास, वर्धा

वर्धा जिल्ह्यातील पुलगाव येथील सीएडी कॅम्प परिसरातील मुदतबाह्य बॉम्ब निकामी करताना स्फोट होताच एक युवक जागीच ठार झाल्याची घटना बुधवारी सकाळी घडल्याने एकच खळबळ उडाली. या बॉम्बमधून बाहेर पडणारे धातू वेचण्याचा मोह या युवकाच्या जीवावर बेतला आहे. विशेषत: असे अपघात नेहमीच होत असतानाही नागरिकांचा निष्काळजीपणा कायमच आहे.

सीएडी कॅम्पमधील मुदतबाह्य बॉम्ब निकामी केल्यानंतर त्यातून तांबे, पितळ, जप्त व लाेखंड असे विविध धातू बाहेर पडतात. हे धातू वेचण्याकरिता सोनेगाव, चिकणी, देवळी, केळापूर आदी परिसरातील नागरिक जात असतात. गेल्या पंधरा दिवसांपासून येथे हे काम सुरु असल्याने केळापूर येथील संदीप मोतीराम तुमडाम (३५) तेथे गेला होता.

तो पळसाच्या झाडामागे दडून बसला पण, या स्फोटात त्याला जीव गमवावा लागला. सीएडीचे कर्मचारी पूर्ण खबरदारी घेऊन हे काम करीत असतात पण, नागरिक लपून छपून जात असल्याने त्यांना अपघातास सामोरे जावे लागत आहे.धातू वेचायला जाणाऱ्यांपैकी दरवर्षी एक-दोन जीव जातातच. २०१६ मध्ये सुद्धा आग लागली असताना मालमत्तेच्या नुकसानासोबतच जीवित हानी झाली होती. याशिवाय २०२२ मध्ये बॉम्बची पेटी खाली पडल्याने मोठा बॉम्बस्फोट झाला होता.

यात सोनेगावचे चार, केळापुरचा एक आणि कॅम्पचा एक अधिकारी असे सहा जण मृत्युमुखी पडले होते. त्यानंतर ऑगस्ट २०२४ मध्ये सोनेगाव (आबाजी) येथील योगेश केशव नेरकर यांचा मृत्यू झाला तर एकाला कायमचे अपंगत्व आले.सीएडी कॅम्प अधिकाऱ्यांनी हे अपघात टाळण्यासाठी उपाययोजना केल्या आहेत. मुदतबाह्य बॉम्ब निकामी करताना पुर्ण बंदोबस्त करुनच कार्यवाही करतात. पण, धातूच्या हव्यासापोटी लगतच्या परिसरातील नागरिक अधिकाऱ्यांची नजर चुकवून परिसरात शिरतात. यातूनच बरेचदा घात होत असून ही मालिका थांबणार कधी, असा प्रश्न उपस्थित होत आहे.