चेतन व्यास, साम टीव्ही

Wardha Hinganghat Theft CCTV Footage: हिंगणघाट शहरातील वर्दळीच्या ठिकाणी असलेल्या कृषी सेवा केंद्राचे शटर तोडून तीन अज्ञात चोरट्यांनी अवघ्या तीन मनिटांत १ लाख ३ हजार रुपयांची रोख रक्कम चोरुन नेली. चोरीचा घटनाक्रम सीसीटीव्ही कॅमेऱ्यात कैद झाला असून चोरट्यांच्या शोधात पोलिस पथके रवाना झाल्याची माहिती आहे.

हिगणघाट (Wardha News) शहरातील वर्दळीचा भाग समजल्या जाणाऱ्या मोहता चौकात पराग कोचर यांच्या मालकीचे कृषी सेवा केंद्र आहे. सध्या खरीप हंगाम सुरु असून पेरणीची लगबग सुरु आहे. या दिवसांत कृषी केंद्रात शेतकऱ्यांची झुंबड होत असल्याने पैशांच्या मोहात चोरट्यांनी कृषी केंद्रात चोरी केल्याचा अंदाज वर्तविला जात आहे.

दोन चोरट्यांनी कृषी केंद्राचे कुलूप तोडून दुकानाच्या आत प्रवेश केला एक चोरटा बाहेर देखरेखीस उभा होता. दोन्ही चोरट्यांनी गल्ल्यातील १ लाख ३ हजार रुपयांची रक्कम चोरुन नेत तिन्ही चोरट्यांनी तेथून पोबारा केला. हा सर्व प्रकार सीसीटीव्ही (CCTV Footage) कॅमेऱ्यांत कैद झाला आहे.

त्यानुसार पोलिसांचे (Police) पथकं आरोपींच्या शोधार्थ रवाना झाल्याची माहिती हिंगणघाट पोलिसांनी दिली आहे. याप्रकरणी पराग कोचर यांनी याबाबतची तक्रार पोलिसांत दिली. पोलिसांनी घटनास्थळ गाठून पंचनाम करीत चोरट्यांविरुद्ध गुन्हा दाखल केला.

Edited by - Satish Daud