बदलापूर - नगरपालिकेच्या आगामी निवडणुकीसाठी प्रभाग रचनेचा प्रारूप आराखडा आज जाहीर करण्यात आला. यात २४ पॅनलमध्ये मिळून ४९ वॉर्डांचा समावेश करण्यात आला आहे. या प्रभाग रचनेवर १७ मार्चपर्यंत हरकती घेता येणार आहेत.बदलापूर (Badlapur) पालिकेची मुदत संपून दोन वर्ष उलटली असली, तरी कोरोनामुळे निवडणूक होऊ शकल्या नाही.

हे देखील पहा -

मात्र आता राज्य निवडणूक आयोगाने निवडणुकीच्या (Election) कामाला सुरुवात केली असून आयोगाच्या आदेशानुसार बदलापूर पालिकेने प्रभाग रचनेचा प्रारूप आराखडा जाहीर केला आहे. नव्या प्रभाग रचनेनुसार बदलापूर शहरात ४९ वॉर्डांचे मिळून २४ पॅनल तयार करण्यात आले आहेत. यापैकी २३ पॅनल हे २ वॉर्डांचे, तर एक पॅनल हा तीन वॉर्डांचा मिळून तयार करण्यात आला आहे. या प्रभाग रचनेबाबत १७ मार्चपर्यंत हरकती आणि सूचना नोंदवता येणार असून २ एप्रिल दरम्यान प्रभाग रचनेचा अंतिम आराखडा जाहीर होण्याची शक्यता आहे.

नव्यानं तयार करण्यात आलेल्या या आराखड्यात दोन वॉर्ड वाढले आहेत. याआधी बदलापूर शहरात एकूण ४७ वॉर्ड होते. मात्र आता ४९ वॉर्ड झाल्यानं सत्तेची मॅजिक फिगर २४ वरून २५ वर गेलीये. अंतिम आराखडा जाहीर झाल्यानंतर २ महिन्यात निवडणूका होऊ शकतील, अशी माहिती बदलापूर पालिकेचे मुख्याधिकारी योगेश गोडसे यांनी दिली आहे.

Edited By - Shivani Tichkule