योगेश काशिद, बीड

सरपंच संतोष देशमुख हत्या प्रकरणात सध्या तुरूंगात असलेल्या वाल्मिक कराडचा नवा कारनामा समोर आला आहे. वाल्मीक कराडचे सिनेसृष्टीशी खास कनेक्शन असल्याचे उघड झाले आहे. वाल्मीक कराड फिल्म प्रोड्यूसर होता. त्याचे आयडी कार्ड सोशल मीडियावर व्हायरल होत आहे.

संतोष देशमुख हत्याकांड प्रकरणातील मुख्य सूत्रधार वाल्मीक कराडचे नवनवीन कारनामे गेल्या काही दिवसांपासून समोर येत आहेत. अशामध्ये आता वाल्मीक कराड चित्रपट निर्माता असल्याची माहिती समोर आली आहे. वाल्मीक कराडकडे इंडियन मोशन पिक्चर प्रोड्यूसर असोसिएशनचे आयडी कार्ड असून त्याचा फोटो व्हायरल झाला आहे. बी आर जे फिल्म प्रोडक्शन या निर्मीती संस्थेचा तो सभासद असल्याचे सांगितले जात आहे. या प्रोडक्शन हाऊसचा तो आजीवन सभासद असल्याचे म्हटले जात आहे.

वाल्मीक कराड यांच्या बीकेसीमधील याच फिल्म प्रोडक्शनच्या ऑफिसचे फोटो देखील समोर आले आहेत. हे वाल्मीक कराडचे ऑफिस असल्याचे सांगितले जात आहे. हे वाल्मीक कराडचे ऑफिस असल्याचा दावा निलंबित पोलिस अधिकारी रणजीत कासले यांनी केला आहे. यासंदर्भात आता जोरदार चर्चा होऊ लागली आहे.