सरपंच हत्या प्रकरणातील संशयित आरोपी वाल्मिक कराड मकोकाच्या गुन्ह्यात तुरुंगात आहे...मात्र तुरुंगातच वाल्मिक कराडची शाही बडदास्त ठेवली जात असल्याचा आरोप करण्यात आलाय.. त्यामुळे देशमुख कुटुंबिय आक्रमक झालंय.. तर प्रशासनाकडे जेलच्या सीसीटीव्हीची मागणी करणार असल्याचं देशमुख कुटुंबियांनी सांगितलंय.

कराडला व्हीआयपी ट्रिटमेंट दिली जात आहे, असा दावा संतोष देशमुखांचा भाऊ धनंजय देशमुख यांनी केला. कराड हा धनुभाऊचा माणूस आहे, असं म्हणत विजय वडेट्टीवारांनी मात्र धनंजय मुंडेंच्या राजीनाम्याची मागणी केलीय. तर अंजली दमानियांनी कराडचे निकटवर्तीय असलेल्या पोलीसांची यादी सांगत सरकारवर निशाणा साधलाय..

कराड धनुभाऊचा माणूस असल्याने VIP ट्रिटमेंट, असा आरोप काँग्रेस आमदार विजय वडेट्टीवार यांनी केला. तर तुरुंगातील सीसीटीव्ही हवा तेव्हा ऑन-ऑफ केला जातो, असा आरोप सामाजिक कार्यकर्त्या अंजली दमानिया यांनी केला आहे.

सरपंच हत्या प्रकरणात एसआयटीने वाल्मिक कराडसह इतर आरोपींवर चौदाशे पानांचं आरोपपत्र दाखल केलंय.. मात्र कराडची शाही बडदास्त ठेवली जात असल्याच्या आरोपामुळे कराडला इतर जिल्ह्याच्या तुरुंगात हलवलं जाणार का? आणि वाल्मिकची व्हीआयपी ट्रिटमेंट देणाऱ्या अधिकाऱ्यांची चौकशी होणार का? याकडे लक्ष लागलंय.