मनोज जयस्वाल, साम टीव्ही

वाशिम: काँग्रेसचे ज्येष्ठ नेते तथा माजी विरोधी पक्षनेते विजय वडेट्टीवार यांच्यासह अन्य पाच जणांविरोधात 100 कोटी रुपयांचा अब्रू नुकसानीचा दावा दाखल केला असून तो वाशिम जिल्हा न्यायालयाने स्वीकारला असल्याची माहिती भाजपचे वाशिम जिल्हा निवडणूक प्रमुख भरत राजे उर्फ राजू पाटील राजे यांनी वाशिम इथ पत्रकार परिषदेत दिली.

पाटील राजे यांनी सांगितले की, 28 डिसेंबर 2025 रोजी विजय वडेट्टीवार यांनी सार्वजनिक माध्यमांसमोर माझ्याविरोधात गंभीर आरोप केले होते. वाशिममध्ये नकली नोटा प्रकरणी माझ्यावर गुन्हा दाखल असूनही अटक झाली नाही.तसेच शासन आरोपींना पाठीशी घालत असल्याचा आरोप करण्यात आला होता. मात्र, हे सर्व आरोप खोटे व निराधार असल्याचे सांगत त्यांनी हा अब्रू नुकसानीचा दावा दाखल केल्याचं त्यांनी स्पष्ट केले.

या प्रकरणी 3 जानेवारी 2026 रोजी विजय वडेट्टीवार यांना कायदेशीर नोटीस बजावून 15 दिवसांत खुलासा करण्यास आणि सार्वजनिक माफी मागण्यास सांगितले होते. मात्र, दिलेल्या मुदतीत ना खुलासा झाला ना माफी मागण्यात आली. त्यामुळे 18 मार्च 2026 रोजी वाशिम जिल्हा सत्र न्यायालयात 100 कोटी रुपयांचा मानहानी दावा दाखल करण्यात आला आहे. न्यायालयाने हा दावा स्वीकारला असून प्रकरणाचा दावा क्रमांक 13/2026 आहे.

पाटील राजे म्हणाले की, माझ्यावर करण्यात आलेले सर्व आरोप खोटे असून याविरोधात न्यायालयात लढा देणार आहे. ज्यांच्याकडे पुरावे असतील त्यांनी ते न्यायालयात सादर करावेत, अन्यथा जनतेची माफी मागावी. या प्रकरणामुळे राजकारण तापले असून विजय वडेट्टीवार यांनी अद्याप तरी कुठली प्रतिक्रिया दिली नाहीये.