- सागर निकवाडे

नंदुरबार जिल्ह्यात पावसाळा लांबल्याने तसेच यावर्षी अधिक तापमानामुळे भाजीपाल्यांचे मोठ्या प्रमाणात नुकसान झाले आहे. शहरातील भाजीपाला मार्केट मध्ये आवक घटल्याने फळ आणि पालेभाज्यांचा तुटवडा जाणवत आहे. परिणामी सर्व भाज्यांच्या दरात वाढ झाली आहे. नंदुरबारमध्ये भाज्यांचे प्रतिकिलो दर शंभर रुपयांपासून वाढले आहेत.

शहरातील बाजारात कांदा, बटाटा, टोमॅटोसह कोथिंबिरीच्या दरात देखील वाढ झाल्याचे चित्र आहे. एप्रिल, मे आणि जून महिन्याच्या सुरुवातीच्या दिवसांत उष्ण वातावरणामुळे पाण्याची उणीव भासत असल्याने शेतकरी भाजीपाल्याची लागवड फारशी करत नाहीत.

पुरेशा उत्पादनाअभावी बाजारात भाज्यांचा तुटवडा जाणवतो आणि मालाला जादा भाव मिळतो. परिणामी भाज्यांची आवक घटल्याने दरात वाढ झाली आहे. पावसामुळे आवक घटल्याने कांदा, मिरची आणि बटाटा, लसूण, अद्रक, फूलकोबी सर्वच भाज्यांचे भाव गगनाला भिडले आहेत.

Edited By : Siddharth Latkar