राज्यात सध्या ऊन पावसाचा खेळ सुरू आहे. काही जिल्ह्यांमध्ये कडाक्याचे ऊन तर काही जिल्ह्यांना अवकाळी पाऊस झोडपून काढताना दिसत आहे. राज्यात पुढचे ४ ते ५ दिवस महत्वाचे असून ढगांच्या गडगडाटासह पाऊस पडण्याची शक्यता आहे. तर काही ठिकाणी गारपीट होण्याची शक्यता आहे. आज पूर्व विदर्भात जोरदार वादळी वाऱ्यासह पाऊस पडण्याची शक्यता आहे. तर विदर्भातील इतर भागात, मध्य महाराष्ट्र आणि मराठवाड्यात वादळी वाऱ्यासह पावसाची शक्यता आहे. हवामान खात्याने येलो अलर्ट जारी केला आहे.

हवामान खात्याने दिलेल्या माहितीनुसार, ‎राज्यात आज अनेक ठिकाणी अंशतः ढगाळ वातावरणासह उन्हाचा चटका कायम राहण्याची शक्यता आहे. विदर्भातील चंद्रपूर आणि गडचिरोली येथे जोरदार वादळी वाऱ्यासह पावसाची शक्यता आहे. या जिल्ह्यांना ऑरेंज अलर्ट जारी करण्यात आला आहे.

पालघर, ठाणे, जळगाव, नाशिक, अहिल्यानगर, पुणे, सातारा, छत्रपती संभाजीनगर, बीड, अमरावती, यवतमाळ, वर्धा, नागपूर, गोंदिया आणि भंडारा या जिल्ह्यांत तुरळक ठिकाणी वादळी वाऱ्यासह पावसाची शक्यता आहे. या सर्व जिल्ह्यांना येलो अलर्ट देण्यात आला आहे.

विदर्भात आज वादळी वाऱ्यासह गारपिटीचा इशारा हवामान विभागाने दिला आहे. मागील दोन दिवसांत नागपूरसह विदर्भाच्या अनेक भागात ढगाळ हवामान आणि पाऊस पडला. अवकाळी पावसामुळे विदर्भातील तापमानात घट झाली. गुजरातवर वाऱ्याची चक्रीय स्थिती निर्माण झाल्याने पुढील ५ दिवस राज्यात अवकाळी पावसाचा अंदाज आहे.

बुधवार आणि गुरुवारी मध्य महाराष्ट्र, मराठवाडा आणि विदर्भातील अनेक ठिकाणी गारपीट होण्याची शक्यता आहे. अरबी समुद्रातून मोठ्या प्रमाणावर बाष्पयुक्त वारे राज्याच्या दिशेने येत आहेत. उष्ण आणि दमट वाऱ्याच्या संगमातून कोकण वगळता संपूर्ण महाराष्ट्रात पुढील ५ दिवस अवकाळी पाऊस पडण्याची शक्यता आहे. त्यामुळे नागरिकांनी आणि शेतकऱ्यांनी काळजी घेण्याचे आवाहन करण्यात आले आहे.