चंद्रपूर जिल्ह्यातील काही भागात आज अवकाळी पावसाचा तडाखा बसला. त्यामुळे नदीनाल्यांना पाणी आलं आहे. दरम्यान अवकाळी पावसामुळे चंद्रपूर जिल्ह्यातल्या कोरपना तालुक्यातील ढोपताळा येथे नाल्यावर तात्पुरता उभारण्यात आलेला पूल वाहून गेला आहे. त्यामुळे चंद्रपूर-आदीलाबाद राष्ट्रीय महामार्गावरील वाहतूक ठप्प झाली आहे.

कोरपना शहराजवळील ढोपताळा येथे नाल्यावर नवीन पुलाचे बांधकाम सुरू आहे. त्यामुळे बाजूने नाल्यात पाईप टाकून पर्यायी मार्ग तयार करण्यात आला होता. मात्र आज दुपारी झालेल्या अवकाळी पावसाने अचानक नाल्यातील पाण्याचा प्रवाह वाढल्याने पाईप आणि रस्ता वाहून गेला. त्यामुळे चंद्रपूर ते तेलंगणा राज्यातील आदीलाबाद या मोठ्या शहरांना जोडणाऱ्या महामार्गावरील वाहतूक पूर्णपणे ठप्प झाली आहे.

चंद्रपूरमध्ये आज दुपारच्या सुमारास अचानक अवकाळी पावसाचंआगमन झाले. विजांच्या कडकडाटासह जोरदार पाऊस झाल्याचं पाहण्यास मिळालं. अचानक आलेल्या पावसाने चंद्रपुरात चाकरमान्यांची धावपळ उडाली. दरम्यान आज कोरपना शहराजवळील ढोपताळा येथे झालेल्या अवकाळी पावसाने पूल वाहून गेला आहे. त्यामुळे या मार्गावरील वाहतूक ठप्प झाली आहे.