Uddhav Thackeray News : "मी काँग्रेसबरोबर गेल्यावर हिंदुत्व सोडलं असेल, तर मुफ्ती मोहम्मद सैद यांच्यासोबत तुम्ही काश्मीरात मांडीला मांडी लावून बसलात, तेव्हा तुम्ही काय सोडलं होतं. तुम्ही म्हणाल तोच हिंदू आणि तुम्ही म्हणाल तोच देशद्रोही अशी तुमची वृत्ती असेल, तर ती गाडण्यासाठी आम्ही वज्रमूठ केली आहे', असा इशारा ठाकरे गटाचे पक्षप्रमुख उद्धव ठाकरे यांनी भाजपला दिला आहे.  (Latest Marathi News)

छत्रपती संभाजीनगरमध्ये आज महाविकास आघाडीची जाहीर 'वज्रमूठ सभा' होत आहे. सांस्कृतिक मंडळ मैदानावर या सभेला सुरूवात झाली. या सभेला संभोधित करताना उद्धव ठाकरे (Uddhav Thackeray) यांनी पंतप्रधान नरेंद्र मोदी, केंद्रीय गृहमंत्री अमित शहा आणि महाराष्ट्रातील शिंदे फडणवीस सरकारवर जोरदार निशाणा साधला.

काय म्हणाले उद्धव ठाकरे?

छत्रपती शिवाजी महाराज, संभाजी महाराजांचं नाव घेतो आणि पाठीवरून वार करतो? शिवसेना, काँग्रेस, राष्ट्रवादी सत्तेसाठी एकत्र आलो होतो. हो आलो होतो. पण आता सत्ता गेल्यानंतरही आम्ही एकत्र आहोत. उलट आता आम्ही घट्ट झालो आहोत, असं उद्धव ठाकरे यांनी ठामपणे सांगितलं. (Maharashtra Political News)

'अमित शहांनी पुण्यात म्हटलं की सत्तेसाठी मी तळवे चाटले. असं नाहीये की मी शिवसेना प्रमुखांची भाषा येत नाही. पण काही शब्द, भाषा त्यांनाच शोभणारी आहे, मला ती शोभणार नाही. पण मी फक्त एवढंच म्हणालो, की आम्ही सत्तेसाठी काँग्रेस-राष्ट्रवादीचे तळवे चाटतो, तर तुम्ही सत्तेसाठी शिंदेंचं काय चाटताय?', असा सवाल ठाकरेंनी भाजपला केला.

"भाजपाचं (BJP) म्हणजे दिसला भ्रष्ट, घेतला पक्षात असं चाललं आहे. देशभरातली बरीच भ्रष्ट माणसं या पक्षात आहेत. जर भारतीय जनता पक्ष म्हणून तुम्ही भ्रष्टाचाऱ्यांना पक्षात घेत असाल, तर पक्षाचं नाव बदलून भ्रष्ट जनता पार्टी असं ठेवा", अशी टीकाही उद्धव ठाकरे यांनी भाजपवर केली.

"मालेगावातल्या सभेत असंख्य मुस्लीम बांधव आले होते. इथेही आले असतील. माझ्यावर आरोप करतायत की मी हिंदुत्व सोडलं. तुम्ही मला एक उदाहरण दाखवा जिथे मी हिंदुत्व सोडलंय. मी आत्ता इथून घरी जाऊन बसेन, तुम्हाला पुन्हा तोंड दाखवणार नाही", असं खुलं आव्हान देखील उद्धव ठाकरे यांनी शिंदे-फडणवीस सरकारला दिलं.

Edited By - Satish Daud