नागपूर : मुंबईत आज मोठ्या राजकीय घडामोडी घडत आहे. शिवसेनेचे दोन दसरा मेळावे आज मुंबईत पार पडणार आहे. शिवसेनेचा (Shivsena) उद्धव ठाकरे (Uddhav Thackeray) यांचा गट आणि शिंदे गट आज दसरा मेळाव्यानिमित्त आमने-सामने आहे. शिंदे गट दसऱ्याच्या मुहूर्तावर उद्धव ठाकरे यांना मोठा धक्का देणार असल्याचा दावा शिवसेनेचे शिंदे गटाचे खासदार कृपाल तुमाणे यांनी केला आहे.

आजच्या दसरा मेळाव्यासाठी बाळासाहेबांवर प्रेम करणारे लोक मुंबईत येतील. भव्य दिव्य असा हा मेळावा असेल, त्या ठिकाणी खऱ्या अर्थानं बाळासाहेबांच्या विचाराचा सोनं लुटण्यासाठी आम्ही जाणार आहोत, असं तुमाणे यांनी म्हटलं आहे. (Latest Marathi News)

दसरा मेळावा हे शक्तीप्रदर्शन नाही. अनेक मोठे नेते आज शिंदे गटात प्रवेश करतील असा दावा कृपाल तुमाणे यांनी केला आहे. दोन खासदार, पाच आमदार आणि अनेक मोठे नेते या मेळाव्यात शिंदे गटात प्रवेश करतील, असं तुमाणे यांनी म्हटलं आहे.

दोन पैकी एक खासदार मुंबईतील तर दुसरा खासदार मराठवाड्यातील असेल, असं तुमाणे यांनी म्हटलं आहे. मात्र ते खासदार आमदार कोण हे सांगण्यास त्यांनी नकार दिला असून सध्याकाळी मेळाव्यात ते स्पष्ट होईल, असं त्यांनी सांगितलं.

त्यामुळे दसरा मेळाव्यानिमित्त आमने-सामने आलेल्या शिंदे गटाकडून उद्धव ठाकरे यांना कोणता धक्का मिळणार याकडे सगळ्यांचं लक्ष लागलं. आहे. दोन्ही दसरा मेळाव्याची तयारी पूर्ण झाली असून दादरमधील शिवाजी पार्क आणि बीकेसी येथील दोन्ही मैदानं सज्ज झाली आहेत.