छत्रपती संभाजीनगर जिल्ह्यातील ऐतिहासिक आणि जागतिक कीर्तीचे वेरूळ लेणी परिसर एका दुर्दैवी घटनेमुळे हादरले. विटखेडा येथील खाजगी क्लासेसचे नऊ विद्यार्थी आणि त्यांचे शिक्षक लेणी पाहण्यासाठी आले होते. यादरम्यान विद्यार्थ्यांपैकी एकाचा पाय घसरून तो जोगेश्वरी कुंडात पडला आणि त्याला वाचविण्याच्या प्रयत्नात शिक्षकाने देखील आपला जीव गमावला. या घटनेमुळे परिसरात शोककळा पसरली असून गावभर हळहळ व्यक्त होत आहे. मृत विद्यार्थ्याचे नाव चेतन संजय पगडे (वर्षे १७) असून शिक्षकाचे नाव राजवर्धन अशोक वानखेडे आहे.

मिळालेल्या माहितीनुसार, विटखेडा येथील खाजगी क्लासेसचे नऊ विद्यार्थी सहलीसाठी वेरूळ लेणी परिसरात गेले होते. लेणीची पाहणी झाल्यानंतर ते डोंगरावरील प्रसिद्ध जोगेश्वरी कुंडाजवळ गेले. या वेळी विद्यार्थी चेतन पगडे हा कुंडाच्या काठावर उभा असताना अचानक पाय घसरून पाण्यात पडला. चेतन पाण्यात तडफडताना पाहून शिक्षक राजवर्धन वानखेडे यांनी क्षणाचाही विलंब न लावता कुंडात उडी घेतली.

मात्र पाण्यात बुडताना घाबरलेल्या चेतनने आपल्या शिक्षकाला घट्ट मिठी मारली. त्यामुळे चेतनसह शिक्षकाचाही तोल गेला आणि दोघेही खोल पाण्यात बुडाले. हा हृदयद्रावक प्रसंग पाहून इतर विद्यार्थी भयभीत झाले. कुंडाजवळ असलेल्या काही गुराख्यांनी तातडीने धाव घेऊन मदतीचा प्रयत्न केला. त्यांनी स्थानिकांच्या मदतीने दोघांना बाहेर काढून जवळच्या रुग्णालयात दाखल केले. मात्र डॉक्टरांनी तपासल्यानंतर चेतन आणि शिक्षक राजवर्धन यांना मृत घोषित केले.

या दुर्दैवी घटनेची माहिती समजताच गावातील नातेवाईक, पालक आणि स्थानिक नागरिक रुग्णालयात धावले. विद्यार्थ्याच्या मृत्यूने त्याच्या कुटुंबावर दुःखाचा डोंगर कोसळला आहे. या घटनेने गावात शोककळा पसरली असून नागरिकांमध्ये हळहळ व्यक्त केली जात आहे.