Shocking:

• अमरावतीमध्ये तलावात बुडून चौघांचा मृत्यू

• मृतांमध्ये सख्ख्या बहीण-भावाचा समावेश

• मृत १२ ते २१ वयोगटातील होते

• अमरावतीच्या घातखेडा तलावात ही घटना घडली

अमर घटारे, अमरावती

अमरावतीमध्ये तलावात बुडून चौघांचा मृत्यू झाला. सुट्ट्या असल्याने हे सर्वजण पोहण्यासाठी तलावावर गेले होते. पण पाण्याचा अंदाज न आल्यामुळे चौघांचा तलावात बुडून मृत्यू झाला. अमरावतीच्या घातखेडा तलावामध्ये ही घटना घडली. मृतांमध्ये सख्ख्या बहीण-भावाचा समावेश आहे. या घटनेमुळे अमरावतीमध्ये खळबळ उडाली आहे.

मिळालेल्या माहितीनुसार, अमरावतीमध्ये पोहायला गेलेल्या दोन बहीण- भावांसह चौघांवर काळाने झळप घातली. तलावामध्ये बुडून चौघांचा दुर्दैवी मृत्यू झाला. हे चौघेही अमरावतीच्या खोलापुरी गेट पोलिस ठाण्याच्या हद्दीत राहणारे असल्याची माहिती समोर आली आहे. घटनेची माहिती मिळताच पोलिसांनी घटनास्थळी धाव घेतली. घटनास्थळी जिल्हा प्रशासनाच्या बचाव पथकाने स्थानिक नागरिकांच्या मदतीने चौघांचेही मृतदेह बाहेर काढण्यात आले.

या घटनेची माहिती मिळताच तलावावर नागरिकांनी मोठी गर्दी केली. मृतांमध्ये सोनाली नरेंद्र जोशी (वय १६ वर्षे), आदित्य नरेंद्र जोशी (१२ वर्षे), पायल बबलू पंडीत (वय २१ वर्षे) आणि यश गजानन काकणे (वय १३ वर्षे) यांचा समावेश आहे. यामधील सोनाली आणि आदित्य सख्खे बहीण-भाव होते. दोघांचा मृत्यू झाल्यामुळे जोशी कुटुंबीयांवर दु:खाचा मोठा डोंगर कोसळला. चौघेही तलावामध्ये पोहण्यासाठी उतरले पण पाण्याचा अंदाज न आल्यामुळे त्यांचा बुडून मृत्यू झाला.

नाशिकच्या मनमाडमध्ये स्विमिंग पूलमध्ये बुडून तरुणाचा मृत्यू झाला. नातेवाईकाच्या लग्नासाठी हा तरुण नाशिक येथून मनमाडला आला होता. यावेळी हॉटेलच्या स्विमिंग पूलमध्ये तो मित्रांसोबत पोहण्यासाठी गेला होता. पण पोहताना अचानक तो बुडू लागला. त्याला स्विमिंग पूलमधून बाहेर काढण्यात आले आणि सीपीआर देण्यात आला. त्यानंतर त्याला रुग्णालयात नेण्यात आले. पण तोपर्यंत उशिर झाला होता. या ३० वर्षीय तरुणाचा मृत्यू झाला.