- हर्षदा सोनोने 

Akola News : अकोला जिल्ह्यातील गांधीग्राम येथील पूर्णा नदीवरील पूल पहिल्याच पावसात वाहून गेला आहे. परिणामी या पूलावरील वाहतुक बंद करण्यात आली आहे. गोपाल खेड येथून वाहतूक सुरु असून नागरिकांनी त्या मार्गाचा वापर करावा असे आवाहन करण्यात आले आहे. (Maharashtra News)

अकोला (akola) जिल्ह्यात (गेल्या 24 तासांत 125.7 मिलीमीटर पाऊस) गेल्या काही दिवसांपासून उत्तम पाऊस झाला आहे. यामुळे जिल्ह्यात पेरणीने जोर धरला आहे. शेतकरी सध्या शेतीच्या कामात व्यस्त आहेत. यावर्षी सोयाबीन आणि कपाशीचा पेरा वाढला आहे. आज सकाळपासून ढगाळ वातावरण असून जोरदार पाऊस पडण्याची शक्यता नाकारता येत नाहीत. दरम्यान पावसामुळे पूर्णा नदीवरील पूल वाहून गेला आहे.

अकोट (akot) तालुक्यातील गांधीग्राम येथील पूर्णा नदीवरील (purna river) इंग्रजकालीन पूलाची दूरावस्था झाली हाेती. या रस्त्यावरील वाहतूक बंद करण्यात आली होती. त्यानंतर पर्यायी पूल म्हणून नदीच्या आतमध्ये छोटा चार कोटींचा पूल बांधण्यात आला होता. मात्र हा पूल वाहून जाईल अशी शक्यता पूल बांधतानाच व्यक्त करण्यात येत होती.

हा पूल बांधण्यासाठी केंद्रीय मंत्री नितीन गडकरी (Nitin Gadkari) यांनी त्यांच्या विकास निधीतून चार कोटी रुपये मंजूर केले होते. त्यानंतर पूलाचे बांधकाम झाले. त्यावरून वाहतूक सुरू करण्यात आली होती.

या छोट्या पुलावरून जात असताना वाहनधारकांना जीव मुठीत धरून जावे लागत होते. गेेले दोन दिवस झालेल्या पावसामुळे पूर्णा नदीच्या पाणी पातळीत वाढ झाल्याने पहिल्याच पुरात हा पूल वाहून गेला आहे. त्यामुळे या पुलावरील (road closed) वाहतूक बंद करण्यात आली आहे. सध्या गोपाल खेड येथून वाहतूक सुरु करण्यात आली आहे.

Edited By : Siddharth Latkar