- बालाजी सुरवसे

Tuljapur News : तुळजाभवानी मंदीर विकास प्रारूप आराखड्यातील दर्शन मंडपाच्या जागेवरून वादंग निर्माण झाला आहे. दर्शन मंडप हा घाटशिळ येथे करण्यात पुजारी व व्यापारी व स्थानिक नागरिकांनी विरोध दर्शविला आहे. दरम्यान उद्या (ता. 11 ऑक्टोबर) तुळजापुर बंदची हाक देण्यात आली आहे. (Maharashtra News)

नवरात्रोत्सव (Navratri 2023) जवळ आला आहे. संपुर्ण राज्यातून तसेच देश-विदेशातून उत्सव काळात भाविक तुळजापुरला येत असतात. दरम्यान तुळजाभवानी मंदीर विकास प्रारूप आराखड्यातील दर्शन मंडपाच्या जागेवरून वाद सुरु झाला आहे.

घाटशीळ येथे दर्शन मंडप नकाे अशी भूमिका काही पुजारी, व्यापारी, स्थानिकांची आहे. त्यातूनच उद्या (बुधवार) तुळजापूर शहर बंदची हाक देण्यात आली आहे. तुळजाभवानी देवीच्या मुख्य महाद्वार येथे असावा अशी भावना पुजारी आणि व्यापाऱ्यांची आहे.

या अराखड्याचे बुधवारी सायंकाळी पाच वाजता तुळजाभवानी मंदीर संस्थान प्रशासकीय कार्यालयासमोर सादरीकरण होणार आहे. 15 ऑक्टोबरपर्यंत यावर सूचना भाविक, पुजारी, व्यापारी आणि स्थानिक नागरिक यांना करता येतील.

16 व 17 ऑक्टोबरला समक्ष सूचनांवर चर्चा होईल. 20 ऑक्टोबरपर्यंत नागरिक आणि भाविकांनी केलेल्या सुचनांवर तांत्रिक आणि प्रशासकीय विभागाकडून अभिप्राय घेतला जाईल. त्यानंतर 26 ऑक्टोबरपर्यंत जिल्हाधिकारी यांना याबाबतचा अंतिम अहवाल सादर करण्यात येणार आहे.

Edited By : Siddharth Latkar