अभिजीत सोनवणे, साम टीव्ही

नाशिक : आगामी स्थानिक स्वराज्य संस्थेच्या निवडणुकीआधी नाशिकमध्ये शिंदे गटाला मोठा झटका बसला आहे. सहा टर्म नगरसेवक राहिलेल्या डॉ. हेमलता पाटील या दोन महिन्यातच शिंदे गटाची साथ सोडणार आहेत. त्यांनी दोन महिन्यापूर्वी काँग्रेसमधून शिंदे गटात प्रवेश केला होता. त्याच डॉ. हेमलता पाटील यांनी शिंदे गटाची साथ सोडली आहे.

काँग्रेसमधून शिंदे गटात गेलेल्या हेमलता पाटील यांनी पुन्हा पक्षातून बाहेर पडण्याचा निर्णय घेतला आहे. पक्षात राहून पक्षाला न्याय देऊ शकत नाही, असं म्हणत हेमलता पाटील यांनी माहिती दिली. हेमलता यांनी फेसबुकवर व्हिडिओ शेअर करत माहिती दिली. विधानसभा निवडणुकीनंतर काँग्रेसमधून शिवसेनेत हेमलता पाटील यांनी प्रवेश केला होता.

30 ते 35 वर्ष काँग्रेसमध्ये काम केल्यानंतर विधानसभा निवडणुकीत पक्षाने उमेदवारी नाकारल्याने हेमलता पाटील नाराज होत्या. याच नाराजीनंतर त्यांनी काँग्रेस सोडून शिवसेनेत जाण्याचा निर्णय घेतला होता. काँग्रेसची साथ सोडताना हेमलता पाटील यांना अश्रू अनावर झाले होते. सध्या कुठल्याही पक्षात प्रवेश न करता सामाजिक संघटनेच्या माध्यमातून काम करत राहणार असल्याची माहिती हेमलता पाटील यांनी दिली.

कोल्हापुरात ठाकरे गटाला धक्का

कोल्हापुरात ठाकरे गटाला मोठा धक्का बसला. विधानसभा निवडणुकीत ठाकरे गटाचे माजी आमदार संजय बाबा घाटगे यांनी बंडखोरी करत महायुतीचे उमेदवार हसन मुश्रीफ यांना पाठिंबा दिला होता. त्यांच्या पाठिंब्यामुळे मुश्रीफांचा विजय सोपा झाला . त्याचेच फळ म्हणून जिल्हा बँकेत संजय बाबा घाटगे यांना संचालक मंडळात स्थान देण्यात आलं. आता त्यांनी थेट उद्धव ठाकरेंची साथ सोडत भाजपचे कमळ हाती घेतलं.