संघर्ष गांगुर्डे

ठाणे जिल्ह्यातील टिटवाळा परिसरातून एक धक्कादायक घटना समोर आली आहे. शेजारच्या दोन अल्पवयीन मुलींशी छेडछाड केल्याप्रकरणी खासगी क्रिकेट कोचला पोलिसांनी अटक केली आहे. या घटनेमुळे स्थानिकांमध्ये संतापाची लाट उसळली आहे. यामुळे पालकांमध्ये मुलांच्या सुरक्षिततेबाबत गंभीर चिंता व्यक्त कऱण्यात येतेय.

पोलिसांनी दिलेल्या माहितीनुसार, आरोपीचे वय ५९ वर्षे असून तो खासगी क्रिकेट कोच म्हणून काम करत होता. पीडित मुलींचं वय १२ ते १४ वर्षे असल्याची माहिती आहे. गेल्या वर्षी दिवाळीच्या काळात आरोपीने एका मुलीला चुकीच्या पद्धतीने स्पर्श केला होता. त्यानंतर नुकतंच आता दुसऱ्या मुलीशीही अशाच प्रकारे विनयभंग करण्याचा प्रयत्न केला.

या घटनेची माहिती दुसऱ्या मुलीने आपल्या पालकांना दिल्यानंतर त्यांनी तातडीने परिसरातील लोकांशी चर्चा केली. ज्यावेळी हे प्रकरण उघडकीस आलं तेव्हा लक्षात आलं की, आरोपीने यापूर्वीही शेजारच्या मुलीशी अशाच प्रकारे वर्तन केलं होतं. यानंतर दोन्ही पीडितांच्या पालकांनी बुधवारी कल्याण तालुका पोलीस स्टेशनमध्ये तक्रार दाखल केली.

पोलिसांनी केली कारवाई

तक्रार मिळताच पोलिसांनी तात्काळ कारवाई करत आरोपीला ताब्यात घेतलंय. त्याच्याविरुद्ध गुन्हा दाखल करण्यात आला असून पुढील तपास सुरू आहे. मात्र या घटनेमुळे परिसरात मोठी खळबळ उडाली आहे. या प्रकरणामुळे पालकांमध्ये मुलींच्या सुरक्षिततेबाबत चिंता वाढलीये.

पोलिसांनी आरोपीला अटक करून पुढील तपास सुरू केला आहे. या तपासातून आणखी काही माहिती समोर येण्याची शक्यता आहे. अशा घटनांवर कठोर कारवाई होणं आवश्यक असल्याचं स्थानिक नागरिकांचं म्हणणं आहे.