अहमदनगर: आमदार रोहित पवार यांच्यासारखे सर्वगुणसंपन्न नेतृत्व लाभल्यामुळे कर्जत- जामखेडची जनता भाग्यवान आहे, असे प्रतिपादन आमदार नीलेश लंके यांनी केले.

रोहित पवार यांच्या वाढदिवसानिमित्त कोंभळी (ता. कर्जत) येथे आयोजित रक्तदान शिबिरात ते बोलत होते. यावेळी जिल्हा परिषद सदस्य गुलाब तनपुरे, समाजकल्याण समिती सभापती उमेश परहर, राष्ट्रवादी युवकचे तालुकाध्यक्ष नितीन धांडे, अमृत लिंगडे, प्रवीण तापकीर, संदीप गांगर्डे, संजय अनभुले, डॉ. सुनील मुळे, दीपक नन्नवरे, रवींद्र महारनवर, सचिन दरेकर, महेश काळे, अमोल थेटे, सागर गंगावणे उपस्थित होते.

लंके म्हणाले, की रक्तदान शिबिर आयोजनाचा हा उपक्रम अत्यंत कौतुकास्पद आहे. रक्तदान हे सर्वश्रेष्ठ दान आहे. सर्वांनी रक्तदान केले पाहिजे. आमदार रोहित पवार यांच्या माध्यमातून या मतदारसंघातील लोकांना एक अभ्यासू, समाजासाठी काहीतरी करण्याची तळमळ असणारे, सर्वगुणसंपन्न नेतृत्व मिळाले आहे. यामुळे येथील जनता भाग्यवान आहे. खांद्याला खांदा लावून काम करणारे सहकारी पवार यांना लाभले आहेत. येथील स्थानिक कार्यकर्त्यांची मोलाची साथ आमदारांना मिळत आहे.