Samarjit Ghatge News : कागलच्या राजकीय पटलावर पुन्हा एकदा हालचालींना वेग आला आहे. राष्ट्रवादी शरदचंद्र पवार पक्षाचे नेते समरजीत सिंह घाटगे यांना शिवसेना उद्धव बाळासाहेब ठाकरे पक्षात घेण्यासाठी स्थानिक नेत्यांकडून जोरदार प्रयत्न करण्यात येत आहे. ठाकरेंच्या नेत्याने समरजीत सिंह घाटगे यांना शिवसेनेत येण्याची थेट ऑफर दिली आहे. विधानसभा निवडणुकीच्या तोंडावर समरजीत सिंह घाटगे यांनी भाजपला रामराम करत शरद पवारांच्या राष्ट्रवादी काँग्रेसमध्ये प्रवेश केला होता. पण त्यांना विधानसभेला पराभावाचा धक्का बसलाय. आता त्यांना ठाकरेंच्या शिवसेनेकडून ऑफर देण्यात आली आहे.

शिवसेना उपनेते संजय पवार यांनी साम टीव्हीला बोलताना समरजीत सिंह घाटगे यांना पक्षात घेण्यासाठी प्रयत्न करू असे वक्तव्य केलेय. कागलच्या राजकारणात समरजीत सिंह घाटगे यांचा मोलाचा वाटा आहे. हसन मुश्रीफ आणि संजय बाबा घाटगे यांच्या राजकारणाचा फटका कागल तालुक्याला बसला आहे. समरजीत सिंह घाटगे यांना पुन्हा उभारी देण्यासाठी मी स्वतः पक्षप्रमुख उद्धव ठाकरे यांच्यासोबत बोलणार आहे, असे संजय पवार म्हणाले.

कोल्हापूरमधील कागलच्या राजकारणात समरजीत सिंह घाटगे यांचा मोलाचा वाटा राहिला आहे. पण नुकत्याच झालेल्या विधानसभा निवडणुकीत मविआचे उमेदवार असलेल्या समरजीत यांचा पराभव झाला. महायुतीचे राष्ट्रवादीचे नेते हसन मुश्रीफ यांनी त्यांचा पराभव केला होता. दरम्यान, विधानसभेला संजय बाबा घाटगे यांनी शिवसेनेत असूनही मुश्रीफ यांना मदत केल्याने समरजीत यांच्या पराभवाला हातभार लागला, अशी टीका होत आहे.

समरजीत सिंह घाटगे यांना ठाकरे गटाकडून थेट ऑफर दिली गेली, त्यानंतर कागलच्या राजकारणात चर्चेला उधाण आले. या घडामोडींमुळे कागलच्या राजकारणात नवे वादळ येण्याची शक्यता आहे. समरजीत यांचा शिवसेनेत प्रवेश झाल्यास स्थानिक राजकारणाची समीकरणे बदलू शकतात. पण मविआमध्ये वितुष्ट येण्याची शक्यता आहे.