Ahmednagar News: अहमदनगर जिल्ह्यातील काष्टी हे गाव गुन्हेगारी विश्वासाठी कायमच चर्चेत राहिलं आहे. या गावात आधी भुरट्या चोरांच्या टोळीने धुमाकूळ घातला होता. अशात आता या गावात लेडी गँगची दहशत पसरली आहे. गावात गेल्या दोन ते तीन दिवसांपासून चेहरा झाकून मुलींची एक टोळी फिरताना दिसत आहे. यामुळे संपूर्ण गावात भीतीचे वातावरण पसरले आहे. (Latest Ahmednagar News)

मिळालेल्या माहितीनुसार, गावात दोन दिवसांपूर्वी काही व्यक्तींना या मुलींची टोळी फिरताना दिसली. काळ्याकुट्ट अंधारात या मुली फिरत होत्या. कोणाला आपली ओळख पटूनये यासाठी त्यांनी चेहरा झाकला होता. तसेच या मुलींची देहबोली पाहून त्या दहशत निर्माण करण्यासाठी आल्याचे वाटत आहे, असे गावकरी म्हणाले.

गावकऱ्यांनी पोलिसांत सदर घटनेची माहिती दिली आहे. एवढ्या रात्री फिरताना या मुलींना काहीच भीती कशी वाटत नाही. त्या मुली नेमक्या कोण आहेत? कोणत्या कारणासाठी त्या अशा पद्धतीने फिरत आहेत? असे अनेक प्रश्न गावकऱ्यांना पडले आहेत. गावात संध्याकाळी अंधार पडण्यास सुरूवात झाल्यावर कोणालाही घराबाहेर पडण्यात भीती वाटत आहे. पोलीस या प्रकरणात अधिक तपास करत आहेत.